TIPITAKA Volume 32 : PALI ROMAN Sutta Pitaka Vol 24 : Sutta. Khu. Apa(1) Sattamaṃ naḷamāliyattherāpadānaṃ (107)

[109] |109.36| Padumuttarabuddhassa lokajeṭṭhassa tādino tiṇatthare nisinnassa upasantassa tādino. |109.37| Naḷamālaṃ gahetvāna bandhitvā vījaniṃ ahaṃ buddhassa upanāmesiṃ dipadindassa tādino. |109.38| Paṭaggahetvāna sabbaññū vījaniṃ lokanāyako mama saṅkappamaññāya imaṃ gāthaṃ abhāsatha. |109.39| Yathā me kāyo nibbāyi pariḷāho na vijjati tatheva tividhaggīhi cittaṃ tava vimuccatu. |109.40| Sabbe devā samāgañchuṃ yekeci dumanissitā sussāma buddhavacanaṃ hāsayantañca dāyakaṃ. |109.41| Nisinno bhagavā tattha devasaṅghapurakkhato dāyakaṃ sampahaṃsento imā gāthā abhāsatha. |109.42| Iminā vījanidānena cittassa paṇidhīhi ca subbato nāma nāmena cakkavatti bhavissati. |109.43| Tena kammāvasesena sukkamūlena codito māluto nāma nāmena cakkavatti bhavissati. |109.44| Iminā vījanidānena sammānavipulena ca kappasatasahassamhi duggatiṃ nūpapajjati. |109.45| Tiṃsakappasahassamhi subbatā aṭṭhatiṃsa te ekūnatiṃsasahasse aṭṭha mālutanāmakā. |109.46| Paṭisambhidā catasso vimokkhāpica aṭṭhime chaḷabhiññā sacchikatā kataṃ buddhassa sāsananti. Itthaṃ sudaṃ āyasmā naḷamāliyo thero imā gāthāyo abhāsitthāti. Naḷamāliyattherassa apadānaṃ samattaṃ. Sattamaṃ bhāṇavāraṃ.