TIPITAKA Volume 32 : PALI ROMAN Sutta Pitaka Vol 24 : Sutta. Khu. Apa(1) Chaṭṭhaṃ citakapūjakattherāpadānaṃ (116)

[118] |118.49| Vasāmi rājāyatane sāmacco saparijjano parinibbute bhagavati sikhino lokabandhuno 1- . |118.50| Pasannacitto sumano citakaṃ agamāsahaṃ turiyaṃ tattha vādetvā gandhamālaṃ samokiriṃ. |118.51| Citakamhi pūjaṃ katvāna vanditvā citakaṃ ahaṃ pasannacitto sumano sakaṃ bhavanupāgamiṃ. |118.52| Bhavane upaviṭṭhohaṃ citakapūjaṃ anussariṃ tena kammena dipadinda lokajeṭṭha narāsabha. |118.53| Anubhutvāna sampattiṃ devesu mānusesu ca pattomhi acalaṃ ṭhānaṃ hitvā jayaparājayaṃ. |118.54| Ekattiṃse ito kappe yaṃ pupphamabhiropayiṃ duggatiṃ nābhijānāmi citakapūjāyidaṃ phalaṃ. |118.55| Ekūnatiṃse kappamhi ito soḷasa rājino uggatā nāma nāmena cakkavattī mahabbalā. @Footnote: 1 Yu. sikhine lokabandhune. |118.56| Paṭisambhidā catasso vimokkhāpica aṭṭhime chaḷabhiññā sacchikatā kataṃ buddhassa sāsananti. Itthaṃ sudaṃ āyasmā citakapūjako thero imā gāthāyo abhāsitthāti. Citakapūjakattherassa apadānaṃ samattaṃ.