TIPITAKA Volume 32 : PALI ROMAN Sutta Pitaka Vol 24 : Sutta. Khu. Apa(1) Chaṭṭhaṃ kusumāsaniyattherāpadānaṃ (126)

[128] |128.65| Nagare dhaññavatiyā ahosiṃ brāhmaṇo tadā lakkhaṇe itihāse ca sanighaṇḍusakeṭubhe. |128.66| Padako veyyākaraṇo nimitte kovido ahaṃ mante ca sisse vācesiṃ tiṇṇaṃ vedāna pāragū |128.67| pañca uppalahatthāni piṭṭhiyaṃ ṭhapitāni me āhutiṃ yiṭṭhukāmohaṃ pitumātusamāgame. |128.68| Tadā vipassi bhagavā bhikkhusaṅghapurakkhato obhāsento disā sabbā āgacchati narāsabho. |128.69| Āsanaṃ paññapetvāna nimantitvā mahāmuniṃ santharitvāna taṃ pupphaṃ atinesiṃ sakaṃ gharaṃ. |128.70| Yaṃ me atthi sake gehe āmisaṃ paccupaṭṭhitaṃ tāhaṃ buddhassa pādāsiṃ pasanno sehi pāṇibhi. |128.71| Bhuttāvīkālamaññāya ekaṃ atthaṃ adāsahaṃ anumoditvāna sabbaññū pakkāmi uttarāmukho. |128.72| Ekanavute ito kappe yaṃ pupphamadadiṃ tadā duggatiṃ nābhijānāmi pupphadānassidaṃ phalaṃ. |128.73| Anantarā ito kappe rājāhu varadassano sattaratanasampanno cakkavatti mahabbalo. |128.74| Paṭisambhidā catasso vimokkhāpica aṭṭhime chaḷabhiññā sacchikatā kataṃ buddhassa sāsananti. Itthaṃ sudaṃ āyasmā kusumāsaniyo thero imā gāthāyo abhāsitthāti. Kusumāsaniyattherassa apadānaṃ samattaṃ.