TIPITAKA Volume 32 : PALI ROMAN Sutta Pitaka Vol 24 : Sutta. Khu. Apa(1) Pañcamaṃ mandāravapupphapūjakattherāpadānaṃ (155)

[157] |157.25| Devaputto ahaṃ santo pūjayiṃ sikhināyakaṃ mandāravena pupphena buddhassa abhiropayiṃ. |157.26| Sattāhaṃ chadanaṃ āsi dibbamālyaṃ 1- tathāgate sabbe janā samāgantvā namassiṃsu tathāgataṃ. |157.27| Ekattiṃse ito kappe yaṃ pupphamabhiropayiṃ 2- duggatiṃ nābhijānāmi buddhapūjāyidaṃ phalaṃ. |157.28| Ito ca dasame kappe rājāhosiṃ jutindharo sattaratanasampanno cakkavatti mahabbalo. @Footnote: 1 Ma. dibbaṃ mālaṃ. 2 Ma. pupphamabhipūjayiṃ. |157.29| Paṭisambhidā catasso vimokkhāpica aṭṭhime chaḷabhiññā sacchikatā kataṃ buddhassa sāsananti. Itthaṃ sudaṃ āyasmā mandāravapupphapūjako thero imā gāthāyo abhāsitthāti. Mandāravapupphapūjakattherassa apadānaṃ samattaṃ.