TIPITAKA Volume 32 : PALI ROMAN Sutta Pitaka Vol 24 : Sutta. Khu. Apa(1) ekūnatiṃso paṇṇadāyakavaggo paṭhamaṃ paṇṇadāyakattherāpadānaṃ (281)

[283] |283.1| Paṇṇasāle nisinnomhi paṇṇabhojanabhojano upaviṭṭhañca maṃ santaṃ upagañchi mahāisi. |283.2| Siddhattho lokapajjoto sabbalokatikicchako tassa paṇṇaṃ mayā dinnaṃ nisinnassa 1- paṇṇasanthare. |283.3| Catunavute ito kappe yaṃ paṇṇamadadiṃ tadā duggatiṃ nābhijānāmi paṇṇadānassidaṃ phalaṃ. |283.4| Paṭisambhidā catasso vimokkhāpica aṭṭhime chaḷabhiññā sacchikatā kataṃ buddhassa sāsananti. Itthaṃ sudaṃ āyasmā paṇṇadāyako thero imā gāthāyo abhāsitthāti. Paṇṇadāyakattherassa apadānaṃ samattaṃ. @Footnote: 1 Ma. nisinnaṃ.