TIPITAKA Volume 32 : PALI ROMAN Sutta Pitaka Vol 24 : Sutta. Khu. Apa(1) Aṭṭhamaṃ uttiyattherāpadānaṃ (28)

[30] |30.171| Candabhāgānadītīre suṃsumāro ahaṃ tadā sabhojanapasutāhaṃ 3- nadītitthaṃ agañchahaṃ. |30.172| Siddhattho tamhi samaye sayambhū aggapuggalo nadiṃ taritukāmo so nadītitthaṃ upāgami. |30.173| Opāgate ca sambuddhe ahaṃpi tatthupāgamiṃ upagantvāna sambuddhaṃ imaṃ vācaṃ udīrayiṃ. |30.174| Abhiruyha mahāvīra tārissāmi ahaṃ tuvaṃ pettikaṃ visayaṃ mayhaṃ anukampa mahāmuni. |30.175| Mama uggajjanaṃ sutvā abhirūhi mahāmuni haṭṭho haṭṭhena cittena tāresiṃ lokanāyakaṃ. @Footnote: 1 Yu. tiṃsatime. 2 Ma. Yu. janādhibhū. 3 Ma. sagocarampasutohaṃ. |30.176| Nadiyā pārime tīre siddhattho lokanāyako assāsesi mamaṃ tattha amataṃ pāpuṇissasi. |30.177| Tamhā kāyā cavitvāna devalokaṃ agañchahaṃ dibbaṃ sukhaṃ anubhaviṃ accharāhi purakkhato. |30.178| Sattakkhattuñca devindo devarajjaṃ akāsahaṃ tīṇikhattuṃ cakkavatti mahiyā issaro ahaṃ. |30.179| Vivekamanuyuttohaṃ nipako ca susaṃvuto dhāremi antimaṃ dehaṃ sammā sambuddhasāsane. |30.180| Catunavute ito kappe tāresiṃ yaṃ narāsabhaṃ duggatiṃ nābhijānāmi taraṇāya idaṃ phalaṃ. |30.181| Paṭisambhidā catasso vimokkhāpica aṭṭhime chaḷabhiññā sacchikatā kataṃ buddhassa sāsananti. Itthaṃ sudaṃ āyasmā uttiyo thero imā gāthāyo abhāsitthāti. Uttiyattherassa apadānaṃ samattaṃ.