TIPITAKA Volume 32 : PALI ROMAN Sutta Pitaka Vol 24 : Sutta. Khu. Apa(1) Aṭṭhamaṃ panasaphaladāyakattherāpadānaṃ (388)

[390] |390.43| Ajjuno nāma sambuddho himavante vasī tadā caraṇena ca sampanno samādhikusalo muni. |390.44| Kumbhamattaṃ gahetvāna panasaṃ jīvajīvakaṃ chattapaṇṇe ṭhapetvāna adāsiṃ satthuno ahaṃ. |390.45| Ekanavute ito kappe yaṃ phalaṃ adadiṃ tadā duggatiṃ nābhijānāmi phaladānassidaṃ phalaṃ. |390.46| Svāgataṃ vata me āsi mama buddhassa santike tisso vijjā anuppattā kataṃ buddhassa sāsanaṃ. |390.47| Kilesā jhāpitā mayhaṃ bhavā sabbe samūhatā nāgova bandhanaṃ chetvā viharāmi anāsavo. |390.48| Paṭisambhidā catasso vimokkhāpica aṭṭhime chaḷabhiññā sacchikatā kataṃ buddhassa sāsananti. Itthaṃ sudaṃ āyasmā panasaphaladāyako thero imā gāthāyo abhāsitthāti. Panasaphaladāyakattherassa apadānaṃ samattaṃ.