TIPITAKA Volume 32 : PALI ROMAN Sutta Pitaka Vol 24 : Sutta. Khu. Apa(1) Ekūnacattāḷīso ambaṭaphalavaggo paṭhamaṃ ambaṭaphaladāyakattherāpadānaṃ (381)

[383] |383.1| Sataraṃsī nāma bhagavā sayambhū aparājito vivekakāmo sambuddho gocarāyābhinikkhami. |383.2| Phalahattho ahaṃ disvā upagañchiṃ narāsabhaṃ pasannacitto sumano ambaṭaṃ 1- adadaṃ phalaṃ. |383.3| Catunavute ito kappe yaṃ phalaṃ adadaṃ ahaṃ duggatiṃ nābhijānāmi phaladānassidaṃ phalaṃ. |383.4| Svāgataṃ vata me āsi mama buddhassa santike tisso vijjā anuppattā kataṃ buddhassa sāsanaṃ. |383.5| Kilesā jhāpitā mayhaṃ bhavā sabbe samūhatā nāgova bandhanaṃ chetvā viharāmi anāsavo. |383.6| Paṭisambhidā catasso vimokkhāpica aṭṭhime chaḷabhiññā sacchikatā kataṃ buddhassa sāsananti. @Footnote: 1 Ma. avaṭaṃ. Yu. avaṇṭaṃ. Itthaṃ sudaṃ āyasmā ambaṭaphaladāyako thero imā gāthāyo abhāsitthāti. Ambaṭaphaladāyakattherassa apadānaṃ samattaṃ.