TIPITAKA Volume 32 : PALI ROMAN Sutta Pitaka Vol 24 : Sutta. Khu. Apa(1) Dutiyaṃ labujadāyakattherāpadānaṃ (382)

[384] |384.7| Nagare bandhumatiyā āsiṃ ārāmiko tadā addasaṃ virajaṃ buddhaṃ gacchantaṃ anilañjase. |384.8| Labujassa phalaṃ gayha buddhaseṭṭhassadāsahaṃ ākāse ṭhitako santo paṭiggaṇhi mahāyaso. |384.9| Pītisañjananaṃ 1- mayhaṃ diṭṭhadhammasukhāvahaṃ phalaṃ buddhassa datvāna vippasannena cetasā. |384.10| Adhigañchiṃ tadā pītiṃ vipulañca sukhuttamaṃ uppajjateva ratanaṃ nibbattassa yahiṃ 2- tahiṃ. |384.11| Ekanavute ito kappe yaṃ phalaṃ adadiṃ tadā duggatiṃ nābhijānāmi phaladānassidaṃ phalaṃ. |384.12| Svāgataṃ vata me āsi mama buddhassa santike tisso vijjā anuppattā kataṃ buddhassa sāsanaṃ. |384.13| Kilesā jhāpitā mayhaṃ bhavā sabbe samūhatā nāgova bandhanaṃ chetvā viharāmi anāsavo. @Footnote: 1 Ma. Yu. vittisañjananaṃ .... 2 Ma. tahiṃ. |384.14| Paṭisambhidā catasso vimokkhāpica aṭṭhime chaḷabhiññā sacchikatā kataṃ buddhassa sāsananti. Itthaṃ sudaṃ āyasmā labujadāyako thero imā gāthāyo abhāsitthāti. Labujadāyakattherassa apadānaṃ samattaṃ.