TIPITAKA Volume 32 : PALI ROMAN Sutta Pitaka Vol 24 : Sutta. Khu. Apa(1) Sattamaṃ lasuṇadāyakattherāpadānaṃ (37)

[39] |39.89| Himavantassa avidūre tāpaso āsahaṃ tadā lasuṇaṃ upajīvāmi lasuṇaṃ mayha bhojanaṃ. |39.90| Khāriyo pūrayitvāna saṅghārāmaṃ agañchahaṃ haṭṭho haṭṭhena cittena saṅghassa lasuṇaṃ adaṃ. |39.91| Vipassissa naraggassa sāsane niratassahaṃ saṅghassa lasuṇaṃ datvā kappaṃ saggamhi modahaṃ. |39.92| Ekanavute ito kappe lasuṇaṃ yaṃ adaṃ tadā duggatiṃ nābhijānāmi lasuṇānaṃ idaṃ phalaṃ. |39.93| Paṭisambhidā catasso vimokkhāpica aṭṭhime chaḷabhiññā sacchikatā kataṃ buddhassa sāsananti. Itthaṃ sudaṃ āyasmā lasuṇadāyako thero imā gāthāyo abhāsitthāti. Lasuṇadāyakattherassa apadānaṃ samattaṃ.