TIPITAKA Volume 32 : PALI ROMAN Sutta Pitaka Vol 24 : Sutta. Khu. Apa(1) Sattamaṃ vatthadāyakattherāpadānaṃ (67)

[69] |69.45| Pakkhijāto tadā āsiṃ supaṇṇo garuḷādhipo addasaṃ virajaṃ buddhaṃ gacchantaṃ gandhamādanaṃ. |69.46| Jahitvā garuḷavaṇṇaṃ māṇavattaṃ arādhayiṃ 1- ekavatthaṃ mayā dinnaṃ dipadindassa tādino. |69.47| Tañca dussaṃ paṭiggayha buddho lokagganāyako antalikkhe ṭhito satthā imā gāthā abhāsatha. |69.48| Iminā vatthadānena cittassa paṇidhīhi ca pahāya garuḷayoniṃ devaloke ramissati. |69.49| Atthadassī tu bhagavā lokajeṭṭho narāsabho vatthadānaṃ pasaṃsitvā pakkāmi uttarāmukho. |69.50| Bhave nibbattamānamhi honti me vatthasampadā ākāse chadanaṃ hoti vatthadānassidaṃ phalaṃ. |69.51| Aruṇasā 2- satta janā cakkavattī mahabbalā chattiṃsatimhi āsiṃsu kappamhi manujādhipā. |69.52| Paṭisambhidā catasso vimokkhāpica aṭṭhime chaḷabhiññā sacchikatā kataṃ buddhassa sāsananti. Itthaṃ sudaṃ āyasmā vatthadāyako thero imā gāthāyo abhāsitthāti. Vatthadāyakattherassa apadānaṃ samattaṃ. @Footnote: 1 Po. Yu. māṇavattaṃ adhārayiṃ. Ma. māṇavakaṃ adhārayiṃ. 2 Ma. aruṇavā. Yu. aruṇakā.