อถาปเรน สมเยน ขณฺฑํ ราชปุตฺตํ ติสฺสญฺจ ปุโรหิตปุตฺตํ อนุปพฺพชิตานิ จตุราสีติภิกฺขุสหสฺสานิ ธมฺมามตํ ปาเยสิ. โส ทุติโย อภิสมโย อโหสิ. เตน วุตฺตํ:-

[๔] "ปุนาปรํ อมิตยโส ตตฺถ สจฺจํ ปกาสยิ

จตุราสีติสหสฺสานํ ทุติยาภิสมโย อหู"ติ.

ตตฺถ ตตฺถาติ เขเม มิคทาเยติ อตฺโถ. "จตุราสีติสหสฺสานิ, สมฺพุทฺธ- มนุปพฺพชุนฺ"ติ เอตฺถ เอเต ปน จตุราสีติสหสฺสสงฺขาตา ปุริสา วิปสฺสิสฺส กุมารสฺส อุปฏฺฐากปุริสาเยว. เต ปาโตว วิปสฺสิกุมารสฺส อุปฏฺฐานํ อาคนฺตฺวา กุมารมทิสฺวา ปาตราสตฺถาย คนฺตฺวา ภุตฺตปาตราสา "กุหึ กุมาโร"ติ ปุจฺฉิตฺวา ตโต "อุยฺยานภูมึ คโต"ติ สุตฺวา "ตตฺเถว นํ ทกฺขิสฺสามา"ติ นิกฺขนฺตา นิวตฺตมานํ ตสฺส สารถึ ทิสฺวา "กุมาโร ปพฺพชิโต"ติ สุตฺวา สุตฏฺฐาเนเยว สพฺพาภรณานิ มุญฺจิตฺวา อนฺตราปณโต กาสายานิ วตฺถานิ อาหราเปตฺวา เกสมสฺสุํ โอหาเรตฺวา ปพฺพชึสุ. ปพฺพชิตฺวา จ เต คนฺตฺวา มหาปุริสํ ปริวารยึสุ.