ตตฺถ เหมยูปสมูปโมติ สุวณฺณตฺถมฺภสทิโสติ อตฺโถ. นิจฺฉรตีติ อิโต จิโต จ สนฺธาวติ. รสฺมีติ ปภารสฺมิ. รตฺตึว ปพฺพเต สิขีติ รตฺติยํ ปพฺพตมตฺถเก อคฺคิ วิย รํสิวิชฺโชตา ตสฺส กาเยติ อตฺโถ. วิภชิตฺวาติ วิภาคํ กตฺวา, อุคฺฆฏิตาทิวเสน โสตาปนฺนาทิวเสน จาติ อตฺโถ. ธมฺมนาวนฺติ อฏฺฐงฺคมคฺคสงฺขาตํ ธมฺมนาวํ, จตุโรฆนิตฺถรณตฺถาย ฐเปตฺวาติ อตฺโถ. ทสฺสเนยฺยนฺติ ทสฺสนีโย. สพฺพชนนฺติ สพฺโพ ชโน, สสาวกสํโฆ สมฺมาสมฺพุทฺโธติ อตฺโถ. วิหารนฺติ วิหาโร, สพฺพตฺถ ปจฺจตฺเต อุปโยควจนํ ทฏฺฐพฺพํ.

เวสฺสภู กิร ภควา อุสภวตีนคเร เขเม มิคทาเย ปรินิพฺพายิ. ธาตุโย ปนสฺส วิปฺปกิรึสุ.

อุสภวติปุเร ปุรุตฺตเม

ชินวสโภ ภควา หิ เวสฺสภู