[๓๑] เอวมหํ สํสริตฺวา ปริวชฺเชนฺโต อนาจรํ

ทุกฺกรญฺจ กตํ มยฺหํ โพธิยาเยว การณา"ติ.

ตตฺถ ภูมนฺตลิกฺขกุสโลติ ภูมิสิกฺขาสุ จ ๑- อนฺตลิกฺเขสุ จ โชติจกฺกาจาเร โชติวิชฺชาย จ กุสโลติ อตฺโถ. อุปฏฺฐโกติ อุปฏฺฐายโก. สปฺปติสฺโสติ สปฺปติสฺสโย. นิพฺพุโตติ วินีโต, วิสฺสุโต วา. ตติเย ผเลติ นิมิตฺตสตฺตมี, ตติยผลาธิคมเหตุ นิพฺพุโตติ อตฺโถ. อาทายาติ มํ คเหตฺวา, วตฺตาวตฺเตสูติ ขุทฺทกวตฺตมหาวตฺเตสุ. โกวิโทติ เตสํ ปูรเณ กุสโล. น กฺวจิ ปริหายามีติ กฺวจิปิ สีเลสุ วา สมาธิสมาปตฺติอาทีสุ วา กตฺถจิ กุโตปิ น ปริหายามิ, สพฺพตฺถ เม ปริหานิ นาม น วิชฺชตีติ ทีเปติ. "น โกจิ ปริหายามี"ติปิ ปาโฐ, โสเยวตฺโถ.