อถ ราชา จินฺเตสิ "ปุตฺโต เม วยปฺปตฺโต ฉตฺตมสฺส อุสฺสาเปตฺวา รชฺชสิรึ ปสฺสิสฺสามี"ติ. โส สากิยานํ ปณฺณานิ ปหิณิ "ปุตฺโต เม วยปฺปตฺโต, รชฺเช นํ ปติฏฺฐาเปสฺสามิ, สพฺเพ อตฺตโน เคเหสุ วยปฺปตฺตา ทาริกา อิมํ เคหํ เปเสนฺตู"ติ. เต รญฺโญ สาสนํ สุตฺวา "กุมาโร เกวลํ รูปสมฺปนฺโน, น กิญฺจิ สิปฺปํ ชานาติ, ทารภรณํ กาตุํ น สกฺขิสฺสติ, น มยฺหํ ธีตโร ทสฺสามา"ติ อาหํสุ. ราชา ตํ ปวตฺตึ สุตฺวา ปุตฺตสฺส สนฺติกํ คนฺตฺวา ตมตฺถํ อาโรเจสิ. โพธิสตฺโต "กึ สิปฺปํ ทสฺเสตุํ วฏฺฏตี"ติ อาห. "สหสฺสตฺถามํ ธนุํ อาโรเปตุํ วฏฺฏติ ตาตา"ติ. "เตน หิ อาหราเปถา"ติ อาห. ราชา อาหราเปตฺวา อทาสิ. ตํ ธนุํ ปุริสสหสฺสํ อาโรเปติ, ปุริสสหสฺสํ โอโรเปติ. มหาปุริโส ตํ สราสนํ อาหราเปตฺวา ปลฺลงฺเกน นิสินฺโนว ชิยํ ปาทงฺคุฏฺฐเก เวฐาเปตฺวา กฑฺฒนฺโต ปาทงฺคุฏฺฐเกเนว ธนุํ อาโรเปตฺวา วาเมน หตฺเถน ทณฺเฑ คเหตฺวา ทกฺขิเณน หตฺเถน กฑฺฒิตฺวา ชิยํ โรเปสิ. สกลนครํ อุปฺปตฺตนาการปฺปตฺตํ อโหสิ. "กึ เอโส สทฺโท"ติ จ วุตฺเต "เทโว คชฺชตี"ติ อาหํสุ. อถญฺเญ "ตุเมฺห น ชานาถ น เทโว คชฺชติ องฺคีรสสฺส กุมารสฺส สหสฺสตฺถามํ ธนุํ อาโรเปตฺวา ชิยํ โปเฐนฺตสฺส ชิยปฺปหารสทฺโท เอโส"ติ อาหํสุ. สากิยา ตํ สุตฺวา ตาวตเกเนว อารทฺธจิตฺตา ตุฏฺฐมานสา อเหสุํ.

อถ มหาปุริโส "กึ กาตุํ วฏฺฏตี"ติ อาห. อฏฺฐงฺคุลพหลํ อโยปฏฺฏํ กณฺเฑน วิชฺฌิตุํ วฏฺฏตี"ติ. ตํ วิชฺฌิตฺวา "อญฺญํ กึ กาตุํ วฏฺฏตี"ติ อาห. จตุรงฺคุลพลหํ อสนผลกํ วิชฺฌิตุํ วฏฺฏตีติ. ตมฺปิ วิชฺฌิตฺวา "อญฺญํ กึ กาตุํ วฏฺฏตี"ติ อาห. "วิทตฺถิพหลํ อุทุมฺพรผลกํ วิชฺฌิตุํ วฏฺฏตี"ติ. ตมฺปิ วิชฺฌิตฺวา "อญฺญํ กึ กาตุํ วฏฺฏตี"ติ อาห. ตโต "วาลุกสกฏานี"ติ อาหํสุ. มหาสตฺโต วาลุกสกฏมฺปิ ปลาลสกฏมฺปิ วินิวิชฺฌิตฺวา อุทเก เอกูสภปฺปมาณํ กณฺฑํ เปเสสิ ถเล อฏฺฐอุสภปฺปมาณํ. อถ นํ "วาติงฺคณสญฺญาย วาลํ วิชฺฌิตุํ วฏฺฏตี"ติ อาหํสุ. "เตน หิ โยชนมตฺตํ วาติงฺคณํ พนฺธาเปถา"ติ วตฺวา โยชนมตฺถเก วาติงฺคณสญฺญาย วาลํ พนฺธาเปตฺวา รตฺตนฺธกาเร เมฆปฏเลหิ ฉนฺนาสุ ทิสาสุ กณฺฑํ ขิปิ. ตํ คนฺตฺวา โยชนมตฺถเก วาลํ ผาเลตฺวา ปฐวึ ปาวิสิ. น เกวลํ เอตฺตกเมว, ตํ ทิวสํ มหาปุริโส โลเก วตฺตมานํ สิปฺปํ สพฺพเมว ทสฺเสสิ.