ชลํ หตฺเถ อากิริตฺวา พฺราหฺมณานํ อทํ คชนฺ"ติ.

ตตฺถ ยาจกมนุปฺปตฺเตติ ยาจเก อนุปฺปตฺเต. อนุจฺฉโวติ อนุจฺฉวิโก ปติรูโป. มา เม ภิชฺชิ สมาทานนฺติ สพฺพญฺญุตญฺญาณตฺถาย สพฺพสฺส ยาจกสฺส สพฺพํ อนวชฺชํ อิจฺฉิตํ ททนฺโต ทานปารมึ ปูเรสฺสามีติ ยํ มยฺหํ สมาทานํ,

[๒๕] ตสฺมึ ปน หตฺถิมฺหิ ทินฺเน อมจฺจา โพธิสตฺตํ เอตทโวจุํ "กสฺมา มหาราช มงฺคลหตฺถึ ททตฺถ, นนุ อญฺโญ หตฺถี ทาตพฺโพ, รญฺญา นาม เอวรูโป โอปวโยฺห มงฺคลหตฺถี อิสฺสริยํ อภิวิชยญฺจ อากงฺขนฺเตน น ทาตพฺโพ"ติ. มหาสตฺโต "ยํ มํ ยาจกา ยาจนฺติ, ตเทว มยา ทาตพฺพํ, สเจ ปน มํ รชฺชํ ยาเจยฺยุํ, รชฺชมฺปิ เตสํ ทเทยฺยํ, มยฺหํ รชฺชโตปิ ชีวิตโตปิ สพฺพญฺญุตญฺญาณเมว ปิยตรํ, ตสฺมา ตํ หตฺถึ อทาสินฺ"ติ อาห. เตน วุตฺตํ "ตสฺส นาเค ปทินฺนมฺหี"ติอาทิ. ตตฺถ ตสฺสาติ ตสฺส เตน, ตสฺมึ นาเค หตฺถิมฺหิ ทินฺเน.