ทูตา ราชานํ วนฺทิตฺวา ตสฺสา สนฺติกํ คนฺตฺวา "เทวิ ตุเมฺห กิร ครุธมฺมํ รกฺขถ, ตํ โน เทถา"ติ วทึสุ. โพธิสตฺตสฺส มาตาปิ ตเถว อตฺตโน กุกฺกุจฺจสฺส อตฺถิภาวํ วตฺวาว เตหิ ยาจิตา อทาสิ. ตถา มเหสีอาทโยปิ. เต สพฺเพสมฺปิ สนฺติเก สุวณฺณปฏฺเฏ ครุธมฺเม ลิขาเปตฺวา ทนฺตปุรํ คนฺตฺวา กลิงฺครญฺโญ ทตฺวา ตํ ปวตฺตึ อาโรเจสุํ. โสปิ ราชา ตสฺมึ ธมฺเม วตฺตมาโน ปญฺจ สีลานิ ปูเรสิ. ตโต สกลกลิงฺครฏฺเฐ เทโว วสฺสิ. ตีณิ ภยานิ วูปสนฺตานิ. รฏฺฐํ เขมํ สุภิกฺขํ อโหสิ. โพธิสตฺโต ยาวชีวํ ทานาทีนิ ปุญฺญานิ กตฺวา สปริโส สคฺคปุรํ ปูเรสิ. ตทา คณิกาทโย อุปฺปลวณฺณาทโย อเหสุํ. วุตฺตเญฺหตํ:-

"คณิกา อุปฺปลวณฺณา ปุณฺโณ โทวาริโก ตทา

รชฺชุคฺคาโห จ กจฺจาโน โทณมาปโก จ โกลิโต.

สาริปุตฺโต ตทา เสฏฺฐี อนุรุทฺโธ จ สารถิ