ตตฺถ ตตฺถาติ ตสฺมึ นคเร. "ตทาหนฺ"ติปิ ปาโฐ. ตสฺส ตทา อหํ, มหาสุทสฺสนกาเลติ อตฺโถ. ตหึ ตหินฺติ ตสฺมึ ฐาเน, ตสฺส ตสฺส ปาการสฺส อนฺโต จ พหิ จาติ อตฺโถ. โก กึ อิจฺฉตีติ พฺราหฺมณาทีสุ โย โกจิ สตฺโต อนฺนาทีสุ เทยฺยธมฺเมสุ ยํ กิญฺจิ อิจฺฉติ. ปตฺเถตีติ ตสฺเสว เววจนํ กสฺส กึ ทิยฺยตุ ธนนฺติ อเนกวารํ ปริยายนฺตเรหิ จ ทานโฆสนาย ปวตฺติตภาวทสฺสนตฺถํ วุตฺตํ, เอเตน ทานปารมิยา สรูปํ ทสฺเสติ. เทยฺยธมฺมปฏิคฺคาหกวิกปฺปรหิตา หิ โพธิสตฺตานํ ทานปารมีติ.

[๓๒] น ตํ ทสสุ ฐาเนสูติ ตํ ทานํ น ทสสุ ฐาเนสุ ปฏิยตฺตนฺติ โยชนา. นปิ ฐานสเตสุ วา ปฏิยตฺตํ, อปิ จ โข อเนกสเตสุ ฐาเนสุ ปฏิยตฺตํ. ยาจเก ธนนฺติ ยาจเก อุทฺทิสฺส ธนํ ปฏิยตฺตํ อุปกฺขฏํ. ทฺวาทสโยชนายาเม หิ นคเร สตฺตสุ ปาการนฺตเรสุ สตฺต ตาลปนฺติปริกฺเขปา, ตาสุ ตาลปนฺตีสุ จตุราสีติ โปกฺขรณิสหสฺสานิ ปาฏิเยกฺกํ โปกฺขรณิตีเร มหาทานํ ปฏฺฐปิตํ วุตฺตเญฺหตํ ภควตา:-