ตสฺส เต สตฺตราชาโน อาทึ กตฺวา สพฺเพว อนุปพฺพชึสุ. สา อโหสิ มหตี ปริสา. อเนกโยชนวิตฺถาราย ปริสาย ปริวุโต มหาปุริโส ธมฺมํ เทเสนฺโต คามนิคมชนปทราชธานีสุ จาริกํ จรติ, มหาชนํ ปุญฺเญ ปติฏฺฐาเปติ. คตคตฏฺฐาเน พุทฺธโกลาหลํ วิย โหติ. มนุสฺสา "โควินฺทปณฺฑิโต กิร อาคจฺฉตี"ติ สุตฺวา ปุเรตรเมว มณฺฑปํ กาเรตฺวา ตํ อลงฺการาเปตฺวา ปจฺจุคฺคนฺตฺวา มณฺฑปํ ปเวเสตฺวา นานคฺครสโภชเนน ปติมาเนนฺติ. มหาลาภสกฺกาโร มโหโฆ วิย อชฺโฌตฺถรนฺโต อุปฺปชฺชิ. มหาปุริโส มหาชนํ ปุญฺเญ ปติฏฺฐาเปสิ สีลสมฺปทาย อินฺทฺริยสํวเร โภชเน มตฺตญฺญุตาย ชาคริยานุโยเค กสิณปริกมฺเม ฌาเนสุ อภิญฺญาสุ อฏฺฐสมาปตฺตีสุ พฺรหฺมวิหาเรสูติ. พุทฺธุปฺปาทกาโล วิย อโหสิ.

โพธิสตฺโต ยาวตายุกํ ปารมิโย ปูเรนฺโต สมาปตฺติสุเขน วีตินาเมตฺวา อายุปริโยสาเน พฺรหฺมโลเก นิพฺพตฺติ. ตสฺส ตํ พฺรหฺมจริยํ อิทฺธญฺเจว ผีตญฺจ วิตฺถาริกํ พาหุชญฺญํ ปุถุภูตํ ยาว เทวมนุสฺเสหิ สุปฺปกาสิตํ จิรํ ทีฆมทฺธานํ ปวตฺติตฺถ. ตสฺส เย สาสนํ สพฺเพน สพฺพํ อาชานึสุ, เต กายสฺส เภทา ปรํ มรณโต สุคตึ พฺรหฺมโลกํ อุปปชฺชึสุ. เย น อาชานึสุ, เต อปฺเปกจฺเจ ปรนิมฺมิตวสวตฺตีนํ เทวานํ สหพฺยตํ อุปปชฺชึสุ, เต อปฺเปกจฺเจ นิมฺมานรตีนํ ฯเปฯ ตุสิตานํ ยามานํ ตาวตึสานํ จาตุมหาราชิกานํ เทวานํ สหพฺยตํ อุปปชฺชึสุ. เย สพฺพนิหีนา, เต คนฺธพฺพกายํ ปริปูเรสุํ. อิติ มหาชโน เยภุยฺเยน พฺรหฺมโลกูปโค สคฺคูปโค จ อโหสิ. ตสฺมา เทวพฺรหฺมโลกา ปริปูรึสุ. จตฺตาโร อปายา สุญฺญา วิย อเหสุํ.

อิธาปิ อกิตฺติชาตเก ๑- วิย โพธิสมฺภารนิทฺธารณา เวทิตพฺพา:- ตทา สตฺต ราชาโน มหาเถรา อเหสุํ, เสสปริสา พุทฺธปริสา, มหาโควินฺโท โลกนาโถ. ตถา เรณุอาทีนํ สตฺตนฺนํ ราชูนํ อญฺญมญฺญาวิโรเธน ยถา สกรชฺเช ปติฏฺฐาปนํ, ตถา มหติ สตฺตวิเธ รชฺเช เตสํ อตฺถธมฺมานุสาสเน อปฺปมาโท, "พฺรหฺมุนาปิ สากจฺฉํ สมาปชฺชตี"ติ ปวตฺตสมฺภาวนํ ยถาภูตํ กาตุํ จตฺตาโร มาเส ปรมุกฺกํสคโต พฺรหฺมจริยวาโส, เตน พฺรหฺมุโน อตฺตนิ สมาปชฺชนํ, พฺรหฺมุโน โอวาเท ฐตฺวา สตฺตหิ ราชูหิ สกเลน จ โลเกน อุปนีตํ ลาภสกฺการํ เขฬปิณฺฑํ วิย ฉฑฺเฑตฺวา อปริมาณาย ขตฺติยพฺราหฺมณาทิปริสาย อนุปพฺพชฺชานิมิตฺตาย ปพฺพชฺชาย อนุฏฺฐานํ, ๒- พุทฺธานํ สาสนสฺส วิย อตฺตโน สาสนสฺส จิรกาลานุปฺปพนฺโธติ เอวมาทโย คุณานุภาวา วิภาเวตพฺพาติ.