ปาตุภูตา เทวทูตา ปพฺพชฺชาสมโย มมา"ติ ๑- วตฺวา สาธุกํ รชฺเช สมนุสาสิตฺวา ยทิปิ อตฺตโน อญฺญานิปิ จตุราสีติ วสฺสสหสฺสานิ อายุ อตฺถิ, เอวํ สนฺเตปิ มจฺจุโน สนฺติเก ฐิตํ วิย อตฺตานํ มญฺญมาโน สํวิคฺคหทโย ปพฺพชฺชํ โรเจติ. เตน วุตฺตํ:-

"สิรสฺมึ ปลิตํ ทิสฺวา มฆเทโว ทิสมฺปติ

สํเวคํ อลภี ธีโร ปพฺพชฺชํ สมโรจยี"ติ. ๒-

โส ปุตฺตํ "อิมินาว นีหาเรน วตฺเตยฺยาสิ ยถา มยา ปฏิปนฺนํ, มา โข ตฺวํ อนฺติมปุริโส อโหสี"ติ โอวทิตฺวา นครา นิกฺขมฺม ภิกฺขุปพฺพชฺชํ ปพฺพชิตฺวา จตุราสีติ วสฺสสหสฺสานิ ฌานสมาปตฺตีหิ วีตินาเมตฺวา อายุปริโยสาเน พฺรหฺมโลกปรายโน อโหสิ. ปุตฺโตปิสฺส พหูนิ วสฺสสหสฺสานิ ธมฺเมน รชฺชํ กาเรตฺวา เตเนว อุปาเยน ปพฺพชิตฺวา พฺรหฺมโลกปรายโน อโหสิ. ตถา ตสฺส ปุตฺโต, ตถา ตสฺส ปุตฺโตติ เอวํ ทฺวีหิ อูนานิ จตุราสีติ ขตฺติยสหสฺสานิ สีเส ปลิตํ ทิสฺวาว ปพฺพชิตานิ. อถ โพธิสตฺโต พฺรหฺมโลเก ฐิโตว "ปวตฺตติ นุ โข มยา มนุสฺสโลเก กตํ กลฺยาณํ น ปวตฺตตี"ติ อาวชฺเชนฺโต อทฺทส "เอตฺตกํ อทฺธานํ ปวตฺตํ, อิทานิ นปฺปวตฺติสฺสตี"ติ. โส "น โข ปนาหํ มยฺหํ ปเวณิยา อิจฺฉิชฺชิตุํ ทสฺสามี"ติ อตฺตโน วํเส ชาตรญฺโญ เอว อคฺคมเหสิยา กุจฺฉิมฺหิ ปฏิสนฺธึ คณฺหิตฺวา อตฺตโน วํสสฺส เนมึ ฆเฏนฺโต วิย นิพฺพตฺโต. เตน วุตฺตํ "เนมึ ฆเฏนฺโต วิย อุปฺปนฺโนติ เนมีติ ลทฺธนาโม"ติ.