อนาถํ ตายถ มมํ ยถาหํ ปติมา สิยนฺ"ติ ๑- สจฺจกิริยมกาสิ. สกฺโก เทวราชา ตสฺสา ปริเทวนสทฺทํ สุตฺวา ตํ ปวตฺตึ ญตฺวา ชลิตํ อโยกูฏํ อาทาย อาคนฺตฺวา ราชานํ ตาเสตฺวา สพฺเพ วิสฺสชฺชาเปสิ. สกฺโกปิ ตทา อตฺตโน ทิพฺพรูปํ ทสฺเสตฺวา สมฺปชฺชลิตํ สโชติภูตํ วชิรํ ปริพฺภมนฺโต "อเร ปาปราช กาฬกณฺณิ กทา ตยา ปาณาติปาเตน สุคติคมนํ ทิฏฺฐปุพฺพํ, จนฺทกุมารํ สพฺพญฺจ อิมํ ชนํ พนฺธนโต โมเจหิ, โน เจ โมเจสฺสสิ, เอตฺเถว เต อิมสฺส จ ทุฏฺฐพฺราหฺมณสฺส สีสํ ผาเลสฺสามี"ติ อากาเส อฏฺฐาสิ. ตํ อจฺฉริยํ ทิสฺวา ราชา พฺราหฺมโณ จ สีฆํ สพฺเพ พนฺธนา โมเจสุํ.

อถ มหาชโน เอกโกลาหลํ กตฺวา สหสา ยญฺญาวาฏํ อชฺโฌตฺถริตฺวา ขณฺฑหาลสฺส เอเกกํ เลฑฺฑุปฺปหารํ เทนฺโต ตตฺเถว นํ ชีวิตกฺขยํ ปาเปตฺวา ราชานมฺปิ มาเรตุํ อารภิ. โพธิสตฺโต ปุเรตรเมว ปิตรํ ปลิสฺสชิตฺวา ฐิโต มาเรตุํ น อทาสิ. มหาชโน "ชีวิตํ ตาวสฺส ปาปรญฺโญ เทม, ฉตฺตํ ปนสฺส น ทสฺสาม, นคเร วาสํ วา น ทสฺสาม, ตํ ขณฺฑหาลํ กตฺวา พหินคเร วาสาเปสฺสามา"ติ ราชเวสํ หาเรตฺวา กาสาวํ นิวาสาเปตฺวา หลิทฺทิปิโลติกาย สีสํ เวเฐตฺวา จณฺฑาลํ กตฺวา จณฺฑาลคามํ ปหิณึสุ. เย ปน ตํ ปสุฆาตยญฺญํ ยชึสุ เจว ยชาเปสุํ จ อนุโมทึสุ จ, สพฺเพ เต นิรยปรายนา อเหสุํ. เตนาห ภควา:-

"สพฺเพ ปวิฏฺฐา นิรยํ ยถา ตํ ปาปกํ กริตฺวาน

น หิ ปาปกมฺมํ กตฺวา ลพฺภา สุคตึ อิโต คนฺตุนฺ"ติ. ๒-