ตตฺถ ยชนา มุตฺโตติ ขณฺฑหาเลน วิหิตยญฺญวิธิโต วุตฺตนเยน ฆาเตตพฺพโต มุตฺโต. นิกฺขนฺโต ยญฺญวาฏโตติ อภิเสกกรณตฺถาย อุสฺสาหชาเตน มหาชเนน สทฺธึ ตโต ยญฺญภูมิโต นิคฺคโต. สํเวคํ ชนยิตฺวานาติ เอวํ "พหุอนฺตราโย โลกสนฺนิวาโส"ติ อติวิย สํเวคํ อุปฺปาเทตฺวา. มหาทานํ ปวตฺตยินฺติ ฉ ทานสาลาโย การาเปตฺวา มหตา ธนปริจฺจาเคน เวสฺสนฺตรทานสทิสํ มหาทานมทาสึ. เอเตน อภิเสกกรณโต ปฏฺฐาย ตสฺส มหาทานสฺส ปวตฺติตภาวํ ทสฺเสติ.

ตทา กิร โพธิสตฺโต สกลชมฺพุทีปํ อุนฺนงฺคลํ กตฺวา มหาเมโฆ วิย อภิวสฺสนฺโต มหาทานํ ปวตฺเตสิ. ตตฺถ กิญฺจาปิ ทานสาลาสุ อนฺนปานาทิอุฬารุฬารปณีตปณีตเมว ยาจกานํ ยถารุจิตํ ทิวเส ทิวเส ทียติ, ตถาปิ อตฺตโน สชฺชิตํ อาหารํ ราชารหโภชนมฺปิ ยาจกานํ อทตฺวา น ภุญฺชติ, ตํ สนฺธาย วุตฺตํ "นาหํ ปิวามี"ติอาทิ.