เต "สาธู"ติ โพธิสตฺตสฺส โอวาทํ สิรสา สมฺปฏิจฺฉิตฺวา อุโปสถงฺคานิ อธิฏฺฐหึสุ. เตสุ อุทฺทโปโต ปาโตว "โคจรํ ปริเยสิสฺสามี"ติ นทีตีรํ คโต. อเถโก พาฬิสิโก สตฺต โรหิตมจฺเฉ อุทฺธริตฺวา วลฺลิยา อาวุณิตฺวา นทีตีเร วาลุกาย ปฏิจฺฉาเทตฺวา มจฺเฉ คณฺหนฺโต นทิยา อโธโสตํ ภสฺสิ. อุทฺโท มจฺฉคนฺธํ ฆายิตฺวา วาลิกํ วิยูหิตฺวา มจฺเฉ ทิสฺวา นีหริตฺวา "อตฺถิ นุ โข เอเตสํ สามิโก"ติ ติกฺขตฺตุํ โฆสิตฺวา สามิกํ อปสฺสนฺโต วลฺลิยํ ฑํสิตฺวา อตฺตโน วสนคุมฺเพ ฐเปตฺวา "เวลายเมว ขาทิสฺสามี"ติ อตฺตโน สีลํ อาวชฺเชนฺโต นิปชฺชิ. สิงฺคาโลปิ โคจรํ ปริเยสนฺโต เอกสฺส เขตฺตโคปกสฺส กุฏิยํ เทฺว มํสสูลานิ เอกํ โคธํ เอกญฺจ ทธิวารกํ ทิสฺวา "อตฺถิ นุ โข เอเตสํ สามิโก"ติ ติกฺขตฺตุํ โฆเสตฺวา สามิกํ อทิสฺวา ทธิวารกสฺส อุคฺคหณรชฺชุกํ คีวายํ ปเวเสตฺวา มํสสูเล จ โคธญฺจ มุเขน ฑํสิตฺวา อตฺตโน วสนคุมฺเพ ฐเปตฺวา "เวลายเมว ขาทิสฺสามี"ติ อตฺตโน สีลํ อาวชฺเชนฺโต นิปชฺชิ. มกฺกโฏปิ วนสณฺฑํ ปวิสิตฺวา อมฺพปิณฺฑํ อาหริตฺวา อตฺตโน วสนคุมฺเพ ฐเปตฺวา "เวลายเมว ขาทิสฺสามี"ติ อตฺตโน สีลํ อาวชฺเชนฺโต นิปชฺชิ. ติณฺณมฺปิ "อโห อิธ นูน ยาจโก อาคจฺเฉยฺยา"ติ จิตฺตํ อุปฺปชฺชิ. เตน วุตฺตํ:-

[๑๓๐] "เต เม สาธูติ วตฺวาน ยถาสตฺติ ยถาพลํ

ทานานิ ปฏิยาเทตฺวา ทกฺขิเณยฺยํ คเวสิสุนฺ"ติ.

โพธิสตฺโต ปน "เวลายเมว นิกฺขมิตฺวา ทพฺพาทิติณานิ ขาทิสฺสามี"ติ อตฺตโน วสนคุมฺเพเยว นิสินฺโน จินฺเตสิ "มม สนฺติกํ อาคตานํ ยาจกานํ ติณานิ ขาทิตุํ น สกฺกา, ติลตณฺฑุลาทโยปิ มยฺหํ นตฺถิ, สเจ เม สนฺติกํ ยาจโก อาคมิสฺสติ, อหํ ติเณน ยาเปมิ, อตฺตโน สรีรมํสํ ทสฺสามี"ติ. เตนาห ภควา:-