ตทา โพธิสตฺโต รุรุมิคโยนิยํ นิพฺพตฺติ, ตสฺส สรีรจฺฉวิ สุฏฺฐุ ตาเปตฺวา มชฺชิตกญฺจนปฏฺฏวณฺโณ อโหสิ หตฺถปาทา สาขารสปริกมฺมกตา วิย นงฺคุฏฺฐํ จมรีนงฺคุฏฺฐํ วิย สิงฺคานิ รชตทามวณฺณานิ อกฺขีนิ สุมชฺชิตมณิคุฬิกา วิย มุขํ โอทหิตฺวา ๑- ฐปิตรตฺตกมฺพลเคณฺฑุกา วิย. โส ชนสํสคฺคํ ปหาย วิเวกวาสํ วสิตุกาโม ปริวารํ ฉฑฺเฑตฺวา เอกโกว คงฺคานิวตฺตเน รมณีเย สาลมิสฺสเก สุปุปฺผิตปวเน วสติ. เตน วุตฺตํ:-

[๔๙] "รมฺเม ปเทเส รมณีเย วิวิตฺเต อมนุสฺสเก

ตตฺถ วาสํ อุปคญฺฉึ คงฺคากูเล มโนรเม"ติ.