"ตสฺส คามวรํ ทมฺมิ นาริโย จ อลงฺกตา

โย ๑- เมตํ มิคมกฺขาติ มิคานํ มิคมุตฺตมนฺ"ติ ๒- คามํ สุวณฺณปฏฺเฏ ลิขาเปตฺวา สกลนคเร วาจาเปสิ. อถ โส เสฏฺฐิปุตฺโต ตํ คาถํ สุตฺวา ราชปุริสานํ สนฺติกํ คนฺตฺวา "รญฺโญ เอวรูปํ มิคํ อาจิกฺขิสฺสามิ, มํ ราชานํ ทสฺเสถา"ติ อาห. ราชปุริสา ตํ รญฺโญ สนฺติกํ เนตฺวา ตมตฺถํ อาโรเจสุํ. ราชา "สจฺจํ โภ อทฺทสา"ติ ปุจฺฉิ. โส "สจฺจํ เทว มยา สทฺธึ อาคจฺฉตุ, อหํ ตํ ทสฺเสสฺสามี"ติ อาห. ราชา ตเมว ปุริสํ มคฺคเทสกํ กตฺวา มหนฺเตน ปริวาเรน ตํ ฐานํ คนฺตฺวา เตน มิตฺตทุพฺภินา ปุริเสน ทสฺสิตํ ปเทสํ อาวุธหตฺเถ ปุริเส สมนฺตโตว ปริวาเรตฺวา "อุกฺกุฏฺฐึ กโรถา"ติ วตฺวา สยํ กติปเยหิ ชเนหิ สทฺธึ เอกมนฺเต อฏฺฐาสิ. โสปิ ปุริโส อวิทูเร อฏฺฐาสิ. มหาสตฺโต สทฺทํ สุตฺวา "มหโต พลกายสฺส สทฺโท, อทฺธา ตมฺหา เม ปุริสา ภเยน อุปฺปนฺเนน ภวิตพฺพนฺ"ติ ญตฺวา อุฏฺฐาย สกลปริสํ โอโลเกตฺวา "รญฺโญ ฐิตฏฺฐาเนเยว เม โสตฺถิ ภวิสฺสตี"ติ ราชาภิมุโข ปายาสิ. ราชา ตํ อาคจฺฉนฺตํ ทิสฺวา "นาคพโล อวตฺถรนฺโต อาคจฺเฉยฺยา"ติ สรํ สนฺนยฺหิตฺวา "อิมํ มิคํ สนฺตาเสตฺวา สเจ ปลายติ, วิชฺฌิตฺวา ทุพฺพลํ กตฺวา คณฺหิสฺสามี"ติ โพธิสตฺตาภิมุโข อโหสิ. มหาสตฺโต:-

"อาคเมหิ มหาราช มา มํ วิชฺฌิ รเถสภ

โก นุ เม อิทมกฺขาสิ เอตฺเถโส ติฏฺฐเต มิโค"ติ ๓-