พฺรหฺมภตฺตา สนฺนิปติตฺวา ทิฏฺฐมงฺคลิกํ มหนฺเตน สกฺกาเรน นครํ ปเวเสตฺวา มหนฺเตน สิริโสภคฺเคน ตตฺถ วสาเปสุํ. เทววิมานสทิสญฺจสฺสา นิเวสนํ กาเรสุํ. ตตฺถ เนตฺวา อุฬารํ ลาภสกฺการํ อุปนาเมสุํ. ปุตฺตลาภาทิ สพฺโพ โพธิสตฺเตน วุตฺตสทิโสว อโหสิ. โสฬสสหสฺสา พฺราหฺมณา ทิฏฺฐมงฺคลิกาย ปุตฺเตน สห นิพทฺธํ ภุญฺชนฺติ, สหสฺสมตฺตา นํ ปริวาเรนฺติ, อเนกสหสฺสานํ ทานํ ทียติ. อถ มหาสตฺโต "อยํ อฏฺฐาเน อภิปฺปสนฺโน, หนฺทสฺส ทกฺขิเณยฺเย ชานาเปสฺสามี"ติ ภิกฺขาย จรนฺโต ตสฺสา เคหํ คนฺตฺวา เตน สทฺธึ สลฺลปิตฺวา อคมาสิ. อถ กุมาโร คาถมาห:-

"กุโต นุ อาคจฺฉสิ ทุมฺมวาสี

โอตลฺลโก ปํสุปิสาจโกว