อถ โส นาคราชานํ กิลมนฺตํ ทิสฺวา อกิลเมนฺโตว อสินา ลตา ฉินฺทิตฺวา ทารกานํ กณฺณเวธโต ปฏิหรณนิยาเมน ๑- อทุกฺขาเปนฺโต สณิกํ นีหริ. ตสฺมึ กาเล เต โภชปุตฺตา ยํ พนฺธนํ ตสฺส นตฺถุโต ปเวเสตฺวา ปฏิมุกฺกํ, ตํ พนฺธนํ สณิกํ โมจยึสุ. มหาสตฺโต มุหุตฺตํ ปาจีนาภิมุโข คนฺตฺวา อสฺสุปุณฺเณหิ เนตฺเตหิ อาฬารํ โอโลเกสิ. ลุทฺทา โถกํ คนฺตฺวา "อุรโค ทุพฺพโล, มตกาเล คเหตฺวาว นํ คมิสฺสามา"ติ นิลียึสุ. อาฬาโร มหาสตฺตสฺส อญฺชลึ ปคฺคยฺห "คจฺเฉว โข ตฺวํ มหานาค, มา ตํ ลุทฺทา ปุน คเหสุนฺ"ติ วทนฺโต โถกํ ตํ นาคํ อนุคนฺตฺวา นิวตฺติ.

โพธิสตฺโต นาคภวนํ คนฺตฺวา ตตฺถ ปปญฺจํ อกตฺวา มหนฺเตน ปริวาเรน นิกฺขมิตฺวา อาฬารํ อุปสงฺกมิตฺวา นาคภวนสฺส วณฺณํ กเถตฺวา ตํ ตตฺถ เนตฺวา ตีหิ กญฺญาสเตหิ สทฺธึ มหนฺตมสฺส ยสํ ทตฺวา ทิพฺเพหิ กาเมหิ สนฺตปฺเปสิ. อาฬาโร นาคภวเน เอกวสฺสํ วสิตฺวา ทิพฺเพ กาเม ปริภุญฺชิตฺวา "อิจฺฉามหํ สมฺม ปพฺพชิตุนฺ"ติ นาคราชสฺส กเถตฺวา ปพฺพชิตปริกฺขาเร คเหตฺวา ตโต นิกฺขมิตฺวา หิมวนฺตปฺปเทสํ คนฺตฺวา ปพฺพชิตฺวา ตตฺถ จิรํ วสิตฺวา อปรภาเค จาริกํ จรนฺโต พาราณสึ ปตฺวา พาราณสิรญฺญา สมาคโต เตน อาจารสมฺปตฺตึ ๒- นิสฺสาย ปสนฺเนน "ตฺวํ อุฬารโภคา มญฺเญ กุลา ปพฺพชิโต, เกน นุ โข การเณน ปพฺพชิโตสี"ติ ปุฏฺโฐ อตฺตโน ปพฺพชฺชาการณํ กเถนฺโต ลุทฺทานํ หตฺถโต โพธิสตฺตสฺส วิสฺสชฺชาปนํ อาทึ กตฺวา สพฺพํ ปวตฺตึ รญฺโญ อาจิกฺขิตฺวา:-

"ทิฏฺฐา มยา มานุสกาปิ กามา