อเถวํ ภควติ ตสฺมึ วิหรนฺเต สุทฺโธทนมหาราชา "ปุตฺโต เม ฉพฺพสฺสานิ ทุกฺกรการิกํ กตฺวา ปรมาภิสมฺโพธึ ปตฺวา ปวตฺติตวรธมฺมจกฺโก ราชคหํ ปตฺวา เวฬุวนมหาวิหาเร วิหรตี"ติ สุตฺวา อญฺญตรํ มหามจฺจํ อามนฺเตสิ "เอหิ ภเณ ปุริสสหสฺสปริวาโร ราชคหํ คนฺตฺวา มม วจเนน `ปิตา โว สุทฺโธทนมหาราชา ตํ ทฏฺฐุกาโม'ติ วตฺวา ปุตฺตํ เม คณฺหิตฺวา เอหี"ติ. โส "สาธุ เทวา"ติ รญฺโญ ปฏิสฺสุณิตฺวา ปุริสสหสฺสปริวาโร สฏฺฐิโยชนมคฺคํ คนฺตฺวา ธมฺมเทสนเวลาย วิหารํ ปาวิสิ. โส "ติฏฺฐตุ ตาว รญฺญา ปหิตสาสนนฺ"ติ ปริสปริยนฺเต ฐิโต สตฺถุ ธมฺมเทสนํ สุตฺวา ยถาฐิโตว สทฺธึ ปุริสสหสฺเสน อรหตฺตํ ปตฺวา ปพฺพชฺชํ ยาจิ. ภควา "เอถ ภิกฺขโว"ติ หตฺถํ ปสาเรสิ, เต สพฺเพ ตงฺขณญฺเญว อิทฺธิมยปตฺตจีวรธรา วสฺสสฏฺฐิตฺเถรา วิย ๑- อากปฺปสมฺปนฺนา หุตฺวา ภควนฺตํ ปริวาเรสุํ. ราชา "เนว คโต อาคจฺฉติ, น จ สาสนํ สุยฺยตี"ติ จินฺเตตฺวา เตเนว นีหาเรน นวกฺขตฺตุํ อมจฺเจ เปเสสิ. เตสุ นวสุ ปุริสสหสฺเสสุ เอโกปิ รญฺโญ นาโรเจสิ. น สาสนํ วา ปหิณิ. สพฺเพ อรหตฺตํ ปตฺวาว ปพฺพชึสุ.

อถ ราชา จินฺเตสิ "โก นุ โข มม วจนํ กริสฺสตี"ติ สพฺพราชพลํ โอโลเกนฺโต อุทายึ อทฺทส. โส กิร รญฺโญ สพฺพตฺถสาธโก อมจฺโจ อพฺภนฺตริโก อติวิสฺสาสิโก โพธิสตฺเตน สทฺธึ เอกทิวเสเยว ชาโต สหปํสุกีฬิโก สหาโย. อถ นํ ราชา อามนฺเตสิ "ตาต อุทายิ อหํ มม ปุตฺตํ ทฏฺฐุกาโม นวปุริสสหสฺสานิ เปเสสึ, เอกปุริโสปิ อาคนฺตฺวา สาสนมตฺตมฺปิ อาโรเจตา นตฺถิ, ทุชฺชาโน โข ปน เม ชีวิตนฺตราโย, อหํ ชีวมาโนว ปุตฺตํ ทฏฺฐุมิจฺฉามิ, สกฺขิสฺสสิ เม ปุตฺตํ ทสฺเสตุนฺ"ติ. โส "สกฺขิสฺสามิ เทว สเจ ปพฺพชิตุํ ลภิสฺสามี"ติ อาห. "ตาต ตฺวํ ปพฺพชิตฺวา วา อปพฺพชิตฺวา วา