ยามา จ เทวา ตุสิตา นิมฺมิตา

ปรนิมฺมิตา เยปิ จ พฺรหฺมกายิกา

อานนฺทิตา วิปุลมกํสุ โฆสนฺ"ติ- อาทิคาถาโย ฐปิตาติ เวทิตพฺพา.

ตตฺถ ภุมฺมาติ ภุมฺมฏฺฐา, ปาสาณปพฺพตวนรุกฺขาทีสุ ฐิตา. มหาราชิกาติ มหาราชปกฺขิกา. ภุมฺมฏฺฐานํ เทวตานํ สทฺทํ สุตฺวา อากาสฏฺฐกเทวตา ตโต อพฺภวลาหกา เทวตา, ตโต อุณฺหวลาหกา เทวตา, ตโต สีตวลาหกา เทวตา, ตโต วสฺสวลาหกา เทวตา, ตโต วาตวลาหกา เทวตา, ตโต จตฺตาโร มหาราชาโน, ตโต ตาวตึสา, ตโต ยามา, ตโต ตุสิตา, ตโต นิมฺมานรตี. ตโต ปรนิมฺมิตวสวตฺตี, ตโต พฺรหฺมกายิกา, ตโต พฺรหฺมปุโรหิตา, ตโต มหาพฺรหฺมาโน, ตโต ปริตฺตาภา, ตโต อปฺปมาณาภา, ตโต อาภสฺสรา, ตโต ปริตฺตสุภา, ตโต อปฺปมาณสุภา, ตโต สุภกิณฺหา, ตโต เวหปฺผลา, ตโต อวิหา, ตโต อตปฺปา, ตโต สุทสฺสา ตโต สุทสฺสี, ตโต อกนิฏฺฐา เทวตา สทฺทํ สุตฺวา มหนฺตํ สทฺทํ อกํสุ. อสญฺญิโน จ อรูปาวจรสตฺเต จ ฐเปตฺวา โสตายตนปวตฺติฏฺฐาเน สพฺเพ เทวมนุสฺสนาคาทโย ปีติวสํ คตหทยา อุกฺกุฏฺฐิสทฺทํ อกํสูติ อตฺโถ. อานนฺทิตาติ ปมุทิตหทยา, สญฺชาตปีติโสมนสฺสา หุตฺวาติ อตฺโถ. วิปุลนฺติ ปุถุลํ.