เสเฬนฺตีติ มุเขน เสฬิตสทฺทํ กโรนฺติ. วาทยนฺตีติ มหตี วิปญฺจิกามกรมุขาทโย วีณา จ ตุริยานิ จ ตถาคตสฺส ปูชนตฺถาย วาเทนฺติ ปโยเชนฺติ. ภุชานิ โปเถนฺตีติ ภุเช อปฺโผเฏนฺติ. ลิงฺควิปริยาโส ทฏฺฐพฺโพ. นจฺจนฺติ จาติ อญฺเญ จ นจฺจาเปนฺติ สยญฺจ นจฺจนฺติ.

ยถา ตุยฺหํ มหาวีร, ปาเทสุ จกฺกลกฺขณนฺติ เอตฺถ เยน ปกาเรน ยถา. มหาวีริเยน โยคโต มหาวีโร. ปาเทสุ จกฺกลกฺขณนฺติ ตว อุโภสุ ปาทตเลสุ สหสฺสารํ สเนมิกํ สนาภิกํ สพฺพาการปริปูรํ จกฺกลกฺขณํ โสภตีติ อตฺโถ. จกฺกสทฺโท ปนายํ สมฺปตฺติรถงฺคอิริยาปถทานรตนธมฺมขุรจกฺกลกฺขณาทีสุ ทิสฺสติ. "จตฺตาริมานิ ภิกฺขว จกฺกานิ เยหิ สมนฺนาคตานํ เทวมนุสฺสานนฺ"ติอาทีสุ ๑- สมฺปตฺติยํ ทิสฺสติ. "จกฺกํว วหโต ปทนฺ"ติอาทีสุ ๒- รถงฺเค. "จตุกฺกํ นวทฺวารนฺ"ติอาทีสุ ๓- อริยาปเถ. "ททํ ภุญฺช จ มา จ ปมาโท, จกฺกํ วตฺตย สพฺพปาณีนนฺ"ติ ๔- เอตฺถ ทาเน. "ทิพฺพํ จกฺกรตนํ ปาตุภูตนฺ"ติ ๕- เอตฺถ รตนจกฺเก. "มยา ปวตฺติตํ จกฺกนฺ"ติ ๖- เอตฺถ ปน ธมฺมจกฺเก. "อิจฺฉาหตสฺส โปสสฺส, จกฺกํ ภมติ มตฺถเก"ติ ๗- เอตฺถ ขุรจกฺเก, ปหรณจกฺเกติ อตฺโถ. "ปาทตเลสุ จกฺกานิ ชาตานี"ติ ๘- เอตฺถ ลกฺขเณ. อิธาปิ ลกฺขณจกฺเก ทฏฺฐพฺโพ. ๙- ธชวชิรปฏากา, วฑฺฒนานงฺกุสาจิตนฺติ ธเชน จ วชิเรน จ ปฏากาย จ วฑฺฒมาเนน จ องฺกุเสน จ อาจิตํ อลงฺกตํ ปริวาริตํ ปาเทสุ จกฺกลกฺขณนฺติ

@๓ สํ.ส. ๑๕/๒๙, ๑๐๙/๑๘, ๗๕ ๔ ขุ.ชา. ๒๗/๑๑๑๐/๒๓๔ (สฺยา)