อเถกทิวสํ ราชา สุปตฺตํ อารุหิตฺวา อมจฺจสหสฺสปริวุโต อุยฺยานํ คจฺฉนฺโต กิลนฺตรูเป ปญฺจสตมตฺเต วาณิชเก นครํ ปวิสนฺเต ทิสฺวา "อิเม อทฺธานกิลนฺตา, อทฺธา อิเมสํ สนฺติกา เอกํ ภทฺทกํ สาสนํ โสสฺสามี"ติ เต ปกฺโกสาเปตฺวา "กุโต อาคตตฺถา"ติ ปุจฺฉิ. อตฺถิ เทว อิโต วีสติโยชนสตมตฺถเก สาวตฺถิ นาม นครํ, ตโต อาคตมฺหาติ. อตฺถิ ปน โว เทเส กิญฺจิ สาสนํ อุปฺปนฺนนฺติ. เทว อญฺญํ กิญฺจิ นตฺถิ, สมฺมาสมฺพุทฺโธ อุปฺปนฺโนติ. ราชา ตาวเทว พลวปีติยา ผุฏฺฐสรีโร กิญฺจิ สลฺลกฺเขตุํ อสกฺโกนฺโต มุหุตฺตํ วีตินาเมตฺวา ปุน "ตาตา กึ วเทถา"ติ ปุจฺฉิ. "พุทฺโธ เทว อุปฺปนฺโน"ติ. ราชา ทุติยมฺปิ ตติยมฺปิ ตเถว วีตินาเมตฺวา จตุตฺถวาเร "กึ วเทถ ตาตา"ติ ปุจฺฉิตฺวา "พุทฺโธ อุปฺปนฺโน"ติ วุตฺเต "ตาตา สุขสาสนสวนาย สตสหสฺสํ โว ทมฺมี"ติ วตฺวา "อปรมฺปิ กิญฺจิ สาสนํ อตฺถิ ตาตา"ติ ปุจฺฉิ. อตฺถิ เทว ธมฺโม อุปฺปนฺโนติ. ราชา ตมฺปิ สุตฺวา ปุริมนเยเนว ตโย วาเร วีตินาเมตฺวา จตุตฺถวาเร "ธมฺโม อุปฺปนฺโน"ติ วุตฺเต "อิธาปิ โว สตสหสฺสํ ทมฺมี"ติ วตฺวา "อปรมฺปิ กิญฺจิ สาสนํ อตฺถิ ตาตา"ติ ปุจฺฉิ. อตฺถิ เทว สํโฆ อุปฺปนฺโนติ. ราชา ตมฺปิ สุตฺวา ตเถว ตโย วาเร วีตินาเมตฺวา จตุตฺถวาเร "สํโฆ อุปฺปนฺโน"ติ วุตฺเต "อิธาปิ โว สตสหสฺสํ ทมฺมี"ติ วตฺวา อมจฺจสหสฺสํ โอโลเกตฺวา "ตาตา กึ กริสฺสามา"ติ ๑- ปุจฺฉิ. "เทว ตุเมฺห กึ กริสฺสถา"ติ. อหํ ตาตา "พุทฺโธ