[๖๔] "จตฺตาโร เต อสงฺเขฺยยฺยา โกฏิ เยสํ น นายติ

สตฺตกาโย จ อากาโส จกฺกวาฬา จนนฺตกา

พุทฺธญาณํ อปฺปเมยฺยํ น สกฺกา เอเต วิชานิตุนฺ"ติ ๑- วุตฺตํ.

ตตฺถ จตฺตาโรติ คณนปริจฺเฉโท. เอเตติ อิทานิ วตฺตพฺเพ อตฺเถ นิทสฺเสติ. อสงฺเขฺยยฺยาติ สงฺขฺยาตุมสกฺกุเณยฺยตฺตา อสงฺเขฺยยฺยา, คณนปถํ วีติวตฺตาติ อตฺโถ โกฏีติ อาทิ วา อนฺโต วา มริยาทา. เยสนฺติ เยสํ จตุนฺนํ อสงฺเขฺยยฺยานํ. น นายตีติ น ปญฺญายติ. อิทานิ เต วุตฺตปฺปกาเร จตฺตาโร อสงฺเขฺยยฺเย ทสฺเสตุํ "สตฺตกาโย"ติอาทิ วุตฺตํ. สตฺตกาโยติ สตฺตสมูโห, สตฺตกาโย อนนฺโต อปริมาโณ อปฺปเมยฺโย. ตถา อากาโส อากาสสฺสาปิ อนฺโต นตฺถิ. ตถา จกฺกวาฬานิ อนนฺตานิ เอว. พุทฺธญาณํ สพฺพญฺญุตญฺญาณํ อปฺปเมยฺยํ. น สกฺกา เอเต วิชานิตุนฺติ ยสฺมา ปเนเต อนนฺตา, ตสฺมา น สกฺกา วิชานิตุํ.