ตตฺถ ยทาติ ยสฺมึ กาเล. อหนฺติ อตฺตานํ นิทฺทิสติ. ตุสิเต กาเยติ ตุสิตสงฺขาเต เทวนิกาเย. ยทา ปนาหํ สมตฺตึส ปารมิโย ปูเรตฺวา ปญฺจ มหาปริจฺจาเค ปริจฺจชิตฺวา ญาตตฺถจริยโลกตฺถจริยพุทฺธตฺถจริยานํ โกฏึ ปตฺวา สตฺตสตกมหาทานานิ ทตฺวา สตฺตกฺขตฺตุํ ปฐวึ กมฺเปตฺวา เวสฺสนฺตรตฺตภาวโต จวิตฺวา ทุติเย จิตฺตวาเร ตุสิตภวเน นิพฺพตฺโต ตทาปิ สนฺตุสิโต นาม เทวราชา อโหสึ. ทสสหสฺสี สมาคมฺมาติ ทสสหสฺสจกฺกวาเฬสุ เทวตา สนฺนิปติตฺวาติ อตฺโถ. ยาจนฺติ ปญฺชลี มมนฺติ มํ อุปสงฺกมิตฺวา "มาริส ตยา ทส ปารมิโย ปูเรนฺเตน น สกฺกสมฺปตฺตึ น มารสมฺปตฺตึ น พฺรหฺมสมฺปตฺตึ น จกฺกวตฺติสมฺปตฺตึ ปตฺเถนฺเตน ปูริตา, โลกนิตฺถรณตฺถาย ปน พุทฺธตฺตํ ปตฺถยมาเนน ปูริตา, โส ตว กาโล มาริส พุทฺธตฺตาย สมโย มาริส พุทฺธตฺตายา"ติ ยาจนฺติ มมนฺติ. เตน วุตฺตํ:-

@๒ องฺ.เอกก. ๒๐/๒๗๗/๒๙, ม.อุ. ๑๔/๑๒๙/๑๑๕, อภิ.วิ. ๓๕/๘๐๙/๔๑๐

@๓ ที.มหา. ๑๐/๔/๒ ๔ ที.มหา. ๑๐/๒๙๓/๑๘๙