โภชปุตฺเต น กุปฺปามิ เอสา เม สีลปารมี"ติ ๒- เอวํ อตฺตปริจฺจาคํ กโรนฺตสฺส สีลปารมี ปรมตฺถปารมี นาม ชาตา.

ตถา มหารชฺชํ ปหาย เนกฺขมฺมปารมิยา ปูริตตฺตภาวานํ ปริมาณํ นาม นตฺถิ. เอกนฺเตน ปนสฺส จูฬสุตฺตโสมชาตเก:-

"มหารชฺชํ หตฺถคตํ เขฬปิณฺฑํว ฉฑฺฑยึ

จชโต น โหติ ลคฺคนํ เอสา เม เนกฺขมฺมปารมี"ติ ๓- เอวํ นิสฺสงฺคตาย รชฺชํ ฉฑฺเฑตฺวา นิกฺขมนฺตสฺส เนกฺขมฺมปารมี ปรมตฺถปารมี นาม ชาตา.