ขีณาสวานํ วิมลานํ สนฺตจิตฺตาน ตาทินํ.

[๘] โกฏิสตสหสฺสานํ ปฐโม อาสิ สมาคโม

ทุติโย โกฏิสหสฺสานํ ตติโย นวุติโกฏินนฺ"ติ.

ตทา กิร อมฺหากํ โพธิสตฺโต วิชิตาวี นาม จกฺกวตฺตี หุตฺวา จนฺทวตีนคเร ปฏิวสติ. โส กิร อเนกนรวรปริวุโต สลิลนิธินิวสนํ สเมรุยุคนฺธรํ อปริมิตวสุธรํ วสุนฺธรํ อทณฺเฑน อสตฺเถน ธมฺเมน ปริปาเลติ. อถ โกณฺฑญฺโญ พุทฺโธปิ โกฏิสตสหสฺสขีณาสวปริวุโต ชนปทจาริกํ จรมาโน อนุปุพฺเพน จนฺทวตีนครํ สมฺปาปุณิ.