18. Siddhatthabuddhavaṃsavaṇṇanā

dhammadassimhi bhagavati parinibbute antarahite cassa sāsane tasmiṃ kappe atīte kappasahasse ca sattasu kappasatesu ca chasu kappesu ca atikkantesu ito catunavutikappamatthake ekasmiṃ kappe ekova lokatthacaro adhigataparamattho siddhattho nāma satthā loke pāturahosi. Tena vuttaṃ:-

[1] "dhammadassissa aparena siddhattho lokanāyako

nihanitvā tamaṃ sabbaṃ sūriyo abbhuggato yathā"ti.