Tena vuttaṃ "sabbaṃ taṃ bodhipācanan"ti.

Tattha sabbasaddo sabbasabbaṃ āyatanasabbaṃ sakkāyasabbaṃ padesasabbanti catūsu atthesu dissati. Tathā hi "sabbe dhammā sabbākārena buddhassa bhagavato ñāṇamukhe āpāthamāgacchantī"tiādīsu sabbasabbasmiṃ. "sabbaṃ vo bhikkhave desessāmi taṃ suṇātha, kiñca bhikkhave sabbaṃ cakkhuṃ ceva rūpā ca .pe. Mano ceva dhammā cā"ti ettha āyatanasabbasmiṃ. "sabbaṃ sabbato sañjānātī"tiādīsu sakkāyasabbasmiṃ. "sabbesampi vo sāriputta subhāsitaṃ pariyāyenā"tiādīsu padesasabbasmiṃ. Idhāpi padesasabbasmiṃ eva veditabbo, bodhisambhārabhūtassa caritassa adhippetattā.

Bodhīti rukkhopi ariyamaggopi nibbānampi sabbaññutaññāṇampi. "bodhirukkhamūle paṭhamābhisambuddho"ti ca "antarā ca gayaṃ antarā ca bodhin"ti ca āgataṭṭhāne bujjhati etthāti rukkho bodhi. "bodhi vuccati catūsu maggesu ñāṇan"ti āgataṭṭhāne cattāri ariyasaccāni bujjhati etenāti ariyamaggo bodhi. "patvāna bodhiṃ amataṃ asaṅkhatan"ti āgataṭṭhāne bujjhati etasmiṃ nimittabhūteti nibbānaṃ bodhi. "pappoti bodhiṃ varabhūrimedhaso"ti āgataṭṭhāne sabbe dhamme sabbākārena bujjhati etenāti sabbaññutaññāṇaṃ bodhi. Idhāpi sabbaññutaññāṇaṃ adhippetaṃ. Arahattamaggasabbaññutaññāṇāni vā idha bodhīti veditabbāni mahābodhiyā adhippetattā bhagavato. Āsavakkhayañāṇapadaṭṭhānaṃ hi sabbaññutaññāṇaṃ sabbaññutaññāṇapadaṭṭhānañca āsavakkhayañāṇaṃ "mahābodhī"ti vuccati. Etthāyaṃ saṅkhepattho:-