Lābhālābhe yasāyase sammānanāvamānane

sabbattha samako hutvā patto sambodhimuttaman"ti- ādi vuttaṃ.

Tattha datvā dātabbakaṃ dānanti tadā anuttaraṃ sammāsambodhiṃ abhisambujjhituṃ aggayānapaṭipadaṃ paṭipannena mahābodhisattena dātabbaṃ deyyadhammaṃ bāhiraṃ rajjādiṃ abbhantaraṃ aṅganayanādiṃ datvā pariccajitvā tato eva rajjapariccāgo aṅgapariccāgo nayanapariccāgo puttadārapariccāgo attapariccāgoti pañcamahāpariccāgapariyosānaṃ dānapāramidānaupapāramidānaparamatthapāramippabhedaṃ dānaṃ anavasesato sampādetvāti attho. Tattha akittibrāhmaṇakāle saṅkhabrāhmaṇakāleti evamādīsu idha āgatesu anāgatesu ca visayhaseṭṭhikāle velāmabrāhmaṇakāleti evamādīsupi dānapāramiyā mahāpurisassa pūritattabhāvānaṃ parimāṇaṃ nāma natthi. Ekantena panassa sasapaṇḍitakāle:-

"bhikkhāya upagataṃ disvā sakattānaṃ pariccajiṃ