paññāya me samo natthi esā me paññāpāramī"ti antobhastagataṃ sappaṃ dassentassa paññāpāramī paramatthapāramī nāma jātā.

Vīriyaṃ katvāna uttamanti sammāsambodhiṃ pāpetuṃ samatthatāya uttamaṃ padhānaṃ vīriyanti vividhampi vīriyapāramiṃ katvā uppādetvā. Tattha mahāsīlavarājakāle pañcāvudhakumārakāle mahāvānarindakāleti evamādīsu vīriyapāramiyā pūritattabhāvānaṃ parimāṇaṃ nāma natthi. Ekantena panassa mahājanakakāle:-

"atīradassī jalamajjhe matā sabbeva mānusā

cittassa aññathā natthi esā me vīriyapāramī"ti evaṃ mahāsamuddaṃ tarantassa vīriyapāramī paramatthapāramī nāma jātā.