Tassa bhāvo kammaṃ vā pāramitā, dānādikiriyāva. Iminā nayena pāramīsaddattho veditabbo.

Katividhāti? saṅkhepato dasavidhā, tā pana pāḷiyaṃ sarūpato āgatāyeva. Yathāha:-

"vicinanto tadā dakkhiṃ paṭhamaṃ dānapāramiṃ

pubbakehi mahesīhi anuciṇṇaṃ mahāpathan"ti- ādi. Yathā cāha "kati nu kho bhante buddhakārakā dhammā? dasa kho sāriputta buddhakārakā dhammā, katame dasa? dānaṃ kho sāriputta buddhakārako dhammo, sīlaṃ nekkhammaṃ paññā vīriyaṃ khanti saccaṃ adhiṭṭhānaṃ mettā upekkhā buddhakārako dhammo, ime kho sāriputta dasa buddhakārakā dhammā"ti. Idamavoca bhagavā idaṃ vatvā sugato athāparaṃ etadavoca satthā:-