Tathā "sambādho gharāvāso rajopatho"tiādinā gharāvāse, "aṭṭhikaṅkhalūpamā kāmā"tiādinā "mātāpi puttena vivadatī"tiādinā kāmesu, "seyyathāpi puriso āṇaṃ ādāya kammante payojeyyā"tiādinā kāmacchandādīsu ādīnavadassanapubbaṅgamā vuttavipariyāyena "abbhokāso pabbajjā"tiādinā pabbajjādīsu ānisaṃsapaṭikaṅkhāvasena nekkhammapāramiyaṃ paccavekkhaṇā veditabbā, ayamettha saṅkhepo, vitthāro pana dukkhakkhandha āsīvisopamasuttādivasena veditabbo.

Tathā "paññāya vinā dānādayo dhammā na visujjhanti, yathāsakaṃ byāpārasamatthā ca na hontī"ti paññāguṇā manasikātabbā. Yatheva hi jīvitena vinā sarīrayantaṃ na sobhati, na ca attano kiriyāsu paṭipattisamatthaṃ hoti, yathā ca cakkhādīni indriyāni viññāṇena vinā yathāsakaṃ visayesu kiccaṃ kātuṃ nappahonti, evaṃ saddhādīni indriyāni paññāya vinā sakiccapaṭipattiyaṃ asamatthānīti pariccāgādipaṭipattiyaṃ paññā padhānakāraṇaṃ. Ummīlitapaññācakkhukā hi mahābodhisattā attano aṅgapaccaṅgānipi datvā anattukkaṃsakā aparavambhakā ca honti, bhesajjarukkhā viya vikapparahitā kālattayepi somanassajātā. Paññāvasena hi upāyakosallayogato pariccāgo parahitappavattiyā dānapāramibhāvaṃ upeti. Attatthaṃ hi dānaṃ vaḍḍhisadisaṃ hoti.

@2 vi.mahā. 2/417/306, Ma.mū. 12/234/16 3 Ma.mū. 12/168/130 4 dī.Sī. 9/218,