vasamānāpi saggesu asaññaṃ nūpapajjare.

Suddhāvāsesu devesu hetu nāma na vijjati

nekkhammaninnā sappurisā visaṃyuttā bhavābhave

caranti lokatthacariyāyo pūrenti sabbapāramī"ti evaṃ saṃvaṇṇitā ānisaṃsā, ye ca "sato sampajāno ānanda bodhisatto tusitā kāyā cavitvā mātukucchiṃ okkamatī"tiādinā soḷasa acchariyabbhutadhammappakārā, ye ca "sītaṃ byāpagataṃ hoti, uṇhañca upasampatī"tiādinā "jāyamāne kho sāriputta bodhisatte ayaṃ dasasahassī lokadhātu saṅkampati sampakampati sampavedhatī"ti- ādinā ca dvattiṃsa pubbanimittappakārā, ye vā panaññepi bodhisattānaṃ adhippāyasamijjhanaṃ kammādīsu vasībhāvoti evamādayo tattha tattha jātakabuddhavaṃsādīsu dassitākārā ānisaṃsā, te sabbepi etāsaṃ ānisaṃsā. Tathā yathānidassitabhedā alobhādosādiguṇayugalādayo cāti veditabbā.