Athekadivasaṃ rājā supattaṃ āruhitvā amaccasahassaparivuto uyyānaṃ gacchanto kilantarūpe pañcasatamatte vāṇijake nagaraṃ pavisante disvā "ime addhānakilantā, addhā imesaṃ santikā ekaṃ bhaddakaṃ sāsanaṃ sossāmī"ti te pakkosāpetvā "kuto āgatatthā"ti pucchi. Atthi deva ito vīsatiyojanasatamatthake sāvatthi nāma nagaraṃ, tato āgatamhāti. Atthi pana vo dese kiñci sāsanaṃ uppannanti. Deva aññaṃ kiñci natthi, sammāsambuddho uppannoti. Rājā tāvadeva balavapītiyā phuṭṭhasarīro kiñci sallakkhetuṃ asakkonto muhuttaṃ vītināmetvā puna "tātā kiṃ vadethā"ti pucchi. "buddho deva uppanno"ti. Rājā dutiyampi tatiyampi tatheva vītināmetvā catutthavāre "kiṃ vadetha tātā"ti pucchitvā "buddho uppanno"ti vutte "tātā sukhasāsanasavanāya satasahassaṃ vo dammī"ti vatvā "aparampi kiñci sāsanaṃ atthi tātā"ti pucchi. Atthi deva dhammo uppannoti. Rājā tampi sutvā purimanayeneva tayo vāre vītināmetvā catutthavāre "dhammo uppanno"ti vutte "idhāpi vo satasahassaṃ dammī"ti vatvā "aparampi kiñci sāsanaṃ atthi tātā"ti pucchi. Atthi deva saṃgho uppannoti. Rājā tampi sutvā tatheva tayo vāre vītināmetvā catutthavāre "saṃgho uppanno"ti vutte "idhāpi vo satasahassaṃ dammī"ti vatvā amaccasahassaṃ oloketvā "tātā kiṃ karissāmā"ti pucchi. "deva tumhe kiṃ karissathā"ti. Ahaṃ tātā "buddho
A. 4/14 (syā) Uppanno saṃgho uppanno"ti sutvā na puna nivattissāmi, bhagavantaṃ uddissa gantvā tassa santike pabbajissāmīti. Mayampi deva tumhehi saddhiṃ pabbajissāmāti. Rājā suvaṇṇapaṭṭe akkharāni likhāpetvā vāṇijakānaṃ datvā "imaṃ anojāya nāma deviyā detha, sā tumhākaṃ tīṇi satasahassāni dassati, evañca pana naṃ vadeyyātha `raññā kira te issariyaṃ vissaṭṭhaṃ, yathāsukhaṃ sampattiṃ paribhuñjāhī"ti, sace pana `vo rājā kahan'ti pucchati, `satthāraṃ uddissa pabbajissāmīti vatvā gato'ti āroceyyāthā"ti āha. Amaccāpi attano attano bhariyānaṃ tatheva sāsanaṃ pahiṇiṃsu. Rājā vāṇijake uyyojetvā assaṃ abhiruyha amaccasahassaparivuto taṅkhaṇaññeva nikkhami.