Te bhikkhū dhātuṃ mahāpathe thūpaṃ kāretvā satthāraṃ upasaṅkamitvā attano katakammaṃ ārocesuṃ. Tato saṃghamajjhe kathā udapādi "tathāgato bhikkhusaṃghena sarīrajhāpanakiccaṃ kāresi, dhātuyo ca gāhāpetvā cetiyaṃ kārāpesi, kataramaggo nu kho tena samadhigato, sāmaṇero nu kho so, bhikkhu nu kho"ti. Satthā taṃ aṭṭhuppattiṃ katvā "patiṭṭhito bhikkhave bāhiyo dārucīriyo arahatto"ti upari dhammadesanaṃ vaḍḍheti. Tassa parinibbutabhāvañca ācikkhitvā "etadaggaṃ bhikkhave mama sāvakānaṃ bhikkhūnaṃ khippābhiññānaṃ yadidaṃ bāhiyo dārucīriyo"ti etadagge ṭhapesi.

Atha naṃ bhikkhū pucchiṃsu "tumhe bhante `bāhiyo dārucīriyo arahattaṃ patto'ti vadetha, kadā so arahattaṃ patto"ti. Mama dhammaṃ sutakāle bhikkhaveti. Kadā panassa bhante tumhehi dhammo kathitoti. Bhikkhāya carantena antaravīthiyaṃ ṭhitenāti. Appamattako bhante tumhehi antaravīthiyaṃ ṭhatvā kathitadhammo kathaṃ so tāvattakena visesaṃ nibbattesīti. Atha ne satthā "bhikkhave mama dhammaṃ `appaṃ' vā `bahuṃ vā'ti mā cintayittha. Anekānipi hi anatthapadasaṃhitāni gāthāsahassāni na seyyo, atthanissitaṃ pana ekampi gāthāpadaṃ seyyo"ti vatvā anusandhiṃ ghaṭetvā dhammaṃ desento imaṃ gāthamāha:-

"sahassamapi ce gāthā anatthapadasaṃhitā

ekaṃ gāthāpadaṃ seyyo yaṃ sutvā upasammatī"ti. Desanāpariyosāne caturāsītiyā pāṇasahassānaṃ dhammābhisamayo ahosīti.