[๑๗๑] |๑๗๑.๑| ภวา สพฺเพ ปริกฺขีณา ภวสนฺธิ ๑- วิโมจิตา สพฺพาสวา จ โน นตฺถิ อาโรเจม มหามุเน ฯ |๑๗๑.๒| ปริกมฺมญฺจ ๒- กุสลํ ยงฺกิญฺจิ สาธุ ๓- ปตฺถิตํ ปริโภคํ ๔- มยา ทินฺนํ ตุยฺหตฺถาย มหามุเน ฯ |๑๗๑.๓| พุทฺธปจฺเจกพุทฺธานํ สาวกานญฺจ ปตฺถิตํ ปริโภคํ มยา ทินฺนํ ตุยฺหตฺถาย มหามุเน ฯ |๑๗๑.๔| อุจฺจานีจํ มยา กมฺมํ ภิกฺขูนํ สาธุ ปตฺถิตํ อุจฺจากุลปริกฺกมฺมํ กตเมฺหหิ ๕- มหามุเน ฯ |๑๗๑.๕| เตเนว สุกฺกมูเลน โจทิตา กมฺมสมฺปทา มานุสิกมติกฺกนฺตา ชายึสุ ขตฺติเย กุเล ฯ |๑๗๑.๖| อุปจิเต ๖- กเต กมฺเม ชาติยา จาปิ ๗- เอกโต ปจฺฉิเม เอกโต ชาตา ขตฺติยา กุลสมฺภวา ฯ |๑๗๑.๗| รูปวตี โภควตี ลาภสกฺการปูชิตา อนฺเตปุเร มหาวีร เทวานํ อิว นนฺทเน ฯ |๑๗๑.๘| นิพฺพินฺทิตฺวา อคารมฺหา ปพฺพชิมฺหานคาริยํ กติปาหํ อุปาทาย สพฺพา ปตฺตามฺห นิพฺพุตึ ฯ @เชิงอรรถ: ๑ ม. ภวา สนฺติ ... ฯ ๒ ม. ยุ. ปุริมํ กุสลํ กมฺมํ ฯ ๓ โป. ยุ. สพฺพํ ฯ @ ๔ ม. ปริโภคมยํ ฯ ยุ. ปริโภคํ อยํ ฯ อิโต ปรํ อีทิสเมว ฯ ๕ ม. กตเมตํ ฯ @ ๖ ม. อุปฺปตฺเตจ ฯ ยุ. อุปฺปตฺเตว ฯ ๗ ม. วาปิ ฯ |๑๗๑.๙| จีวรํ ปิณฺฑปาตญฺจ ปจฺจยํ สยนาสนํ อุปเนนฺติ พหู อเมฺห สทา สกฺกตปูชิตา ฯ |๑๗๑.๑๐| กิเลสา ฌาปิตา อมฺหํ ภวา สพฺเพ สมูหตา นาคีว พนฺธนํ เฉตฺวา วิหราม อนาสวา ฯ |๑๗๑.๑๑| สฺวาคตํ วต โน อาสิ พุทฺธเสฏฺฐสฺส สนฺติเก ติสฺโส วิชฺชา อนุปฺปตฺตา กตํ พุทฺธสฺส สาสนํ ฯ |๑๗๑.๑๒| ปฏิสมฺภิทา จตสฺโส วิโมกฺขาปิจ อฏฺฐิเม ฉฬภิญฺญา สจฺฉิกตา กตํ พุทฺธสฺส สาสนนฺติ ฯ อิตฺถํ สุทํ ยสวตีปมุขานิ ขตฺติยกญฺญา ภิกฺขุนิโย อฏฺฐารสสหสฺสานิ ภควโต สมฺมุขา อิมา คาถาโย อภาสิตฺถาติ ฯ อฏฺฐารสสหสฺสขตฺติยกญฺญาเถรีนํ อปทานํ สมตฺตํ ฯ