[๒๐] |๒๐.๘๔| ปุนาปรํ ยทา โหมิ สงฺขปาโล มหิทฺธิโก ทาฒาวุโธ โฆรวิโส ทฺวิชิโวฺห อุรคาภิภู ฯ |๒๐.๘๕| จตุปฺปเถ มหาปเถ ๑- นานาชนสมากุเล จตุโร องฺเค อธิฏฺฐาย ตตฺถ วาสมกปฺปยึ ฯ |๒๐.๘๖| ฉวิยา จมฺเมน มํเสน นฺหารูหิ อฏฺฐิเกหิ วา ยสฺส เอเตน กรณียํ ทินฺนํเยว หราตุ โส ฯ |๒๐.๘๗| อทฺทสํสุ โภชปุตฺตา ขรา ลุทฺธา อการุณา อุปคจฺฉุํ มมํ ตตฺถ ทณฺฑมุคฺครปาณิโน ฯ |๒๐.๘๘| นาสาย วินิวิชฺฌิตฺวา นงฺคุฏฺเฐ ปิฏฺฐิกณฺฐเก กาเช อาโรปยิตฺวาน โภชปุตฺตา หรึสุ มํ ฯ |๒๐.๘๙| สสาครนฺตํ ปฐวึ สกานนํ สปพฺพตํ อิจฺฉมาโน จหนฺตตฺถ นาสวาเตน ฌาปเย ฯ |๒๐.๙๐| สูเลหิ วิชฺฌยนฺเตปิ โกฏฺฏยนฺเตปิ สตฺติภิ โภชปุตฺเต น กุปฺปามิ เอสา เม สีลปารมีติ ฯ สงฺขปาลจริยํ ทสมํ ฯ ตสฺสุทฺทานํ หตฺถินาโค ภูริทตฺโต จมฺเปยฺโย โพธิ มาหิโส รุรุ มาตงฺคธมฺโม จ อตฺรโช จ ชยทฺทิโส ฯ @เชิงอรรถ: ๑ ม. ยุ. มหามคฺเค ฯ |๒๐.๙๑| เอเต ๑- สพฺเพ สีลพลา ปริกฺขารา ปเทสิกา ชีวิตํ ปริรกฺขิตฺวา สีลานิ อนุรกฺขิสฺสํ ฯ |๒๐.๙๒| สงฺขปาลสฺส เม สโต สพฺพกาลํปิ ชีวิตํ ยสฺส กสฺสจิ นิยฺยนฺตํ ๒- ตสฺมา สา สีลปารมีติ ฯ สีลปารมินิทฺเทโส นิฏฺฐิโต ฯ