TIPITAKA Volume 33 : PALI ROMAN Sutta Pitaka Vol 25 : Sutta. Khu. Apa(2) Buddhavaṃso Cariyāpiṭakaṃ Tatiyaṃ veluvaphaliyattherāpadānaṃ 1- (443)

[33] |33.15| Candabhāgānadītīre assamo sukato mama veluvarukkhehi ākiṇṇo nānādumanisevito. |33.16| Sugandhaṃ veluvaṃ disvā buddhaseṭṭhaṃ anussariṃ khāribhāraṃ pūrayitvā tuṭṭho saṃviggamānaso. |33.17| Kakusandhaṃ upāgamma billapakkamadāsahaṃ puññakkhettassa dhīrassa vippasannena cetasā. |33.18| Imasmiṃyeva kappasmiṃ yaṃ phalaṃ adadiṃ tadā duggatiṃ nābhijānāmi phaladānassidaṃ phalaṃ. |33.19| Kilesā jhāpitā mayhaṃ bhavā sabbe samūhatā nāgova bandhanaṃ chetvā viharāmi anāsavo. |33.20| Svāgataṃ vata me āsi mama buddhassa santike tisso vijjā anuppattā kataṃ buddhassa sāsanaṃ. |33.21| Paṭisambhidā catasso vimokkhāpica aṭṭhime chaḷabhiññā sacchikatā kataṃ buddhassa sāsananti. Itthaṃ sudaṃ āyasmā veluvaphaliyo thero imā gāthāyo abhāsitthāti. Veluvaphaliyattherassa apadānaṃ samattaṃ. @Footnote: 1 Ma. billiyatthera.... Yu. billaphaliyatthera....