TIPITAKA Volume 33 : PALI ROMAN Sutta Pitaka Vol 25 : Sutta. Khu. Apa(2) Buddhavaṃso Cariyāpiṭakaṃ Sattamaṃ kaṭacchubhikkhadāyikātheriyāpadānaṃ (7)

[147] |147.60| Piṇḍacāraṃ carantassa tissanāmassa satthuno kaṭacchubhikkhaṃ paggayha buddhaseṭṭhassadāsahaṃ. |147.61| Paṭiggahetvā sambuddho tisso lokagganāyako vīthiyā saṇṭhito satthā akā me anumodanaṃ. |147.62| Kaṭacchubhikkhaṃ datvāna tāvatiṃsaṃ gamissasi chattiṃsadevarājūnaṃ mahesittaṃ karissasi. |147.63| Paññāsacakkavattīnaṃ mahesittaṃ karissasi manasā patthitaṃ sabbaṃ paṭilacchasi sabbadā. |147.64| Sampattiṃ anubhotvāna pabbajissasikiñcanā sabbāsave pariññāya nibbāyissasināsavā. |147.65| Idaṃ vatvāna sambuddho tisso lokagganāyako nabhaṃ abbhuggami dhīro haṃsarājāva ambare. |147.66| Sudinnameva 1- me dānaṃ suyiṭṭhā yāgasampadā kaṭacchubhikkhaṃ datvāna pattāhaṃ acalaṃ padaṃ. |147.67| Dvenavute ito kappe yaṃ dānamadadintadā duggatiṃ nābhijānāmi bhikkhadānassidaṃ phalaṃ. |147.68| Kilesā jhāpitā mayhaṃ bhavā sabbe samūhatā nāgīva bandhanaṃ chetvā viharāmi anāsavā. |147.69| Svāgataṃ vata me āsi buddhaseṭṭhassa santike tisso vijjā anuppattā kataṃ buddhassa sāsanaṃ. |147.70| Paṭisambhidā catasso vimokkhāpica aṭṭhime chaḷabhiññā sacchikatā kataṃ buddhassa sāsananti. Itthaṃ sudaṃ kaṭacchubhikkhadāyikā bhikkhunī imā gāthāyo abhāsitthāti. Kaṭacchubhikkhadāyikātheriyā apadānaṃ samattaṃ.