TIPITAKA Volume 33 : PALI ROMAN Sutta Pitaka Vol 25 : Sutta. Khu. Apa(2) Buddhavaṃso Cariyāpiṭakaṃ Dasamaṃ maccharājacariyaṃ

[30] |30.83| Punāparaṃ yadā homi maccharājā mahāsare uṇhe suriyasantāpe sare udakaṃ khīyatha. |30.84| Tato kākā ca gijjhā ca kaṅkā 1- kulalasenakā bhakkhayanti divā rattiṃ macche upanisīdiya. |30.85| Evaṃ cintesahaṃ tattha saha ñātīhi pīḷito kena nu kho upāyena ñātī dukkhā pamocaye. |30.86| Cintayitvāna dhammatthaṃ saccaṃ addasaṃ passayaṃ sacce ṭhatvā pamocesiṃ ñātīnaṃ taṃ atikkhayaṃ. |30.87| Anussaritvā sataṃ dhammaṃ paramatthaṃ vicintayaṃ akāsiṃ saccakiriyaṃ yaṃ loke dhuvasassataṃ. |30.88| Yato sarāmi attānaṃ yato pattosmi viññutaṃ nābhijānāmi sañcicca ekapāṇaṃpi hiṃsitaṃ 2- . @Footnote: 1 Yu. bakā. 2 vihiṃsitaṃ itipi. |30.89| Etena saccavajjena pajjunno abhivassatu abhitthanaya pajjunna nidhiṃ kākassa nāsaya. |30.90| Kākaṃ sokāya randhehi macche sokā pamocaya saha kate saccavare pajjunno abhigajjiya. |30.91| Thalaṃ ninnañca pūrento khaṇena abhivassatha evarūpaṃ saccavaraṃ katvā viriyamuttamaṃ. |30.92| Vassāpesiṃ mahāmeghaṃ saccatejabalassito saccena me samo natthi esā me saccapāramīti. Maccharājacariyaṃ dasamaṃ.