[๒๐] อิติ เม ภาสมานสฺส อภิธมฺมกถํ อิมํ

อวิกฺขิตฺตา นิสาเมถ ทุลฺลภา หิ อยํ กถาติ.

นิทานกถา

ตตฺถ อภิธมฺโมติ ๑- เกนฏฺเฐน อภิธมฺโม? ธมฺมาติเรกธมฺมวิเสสฏฺเฐน. อติเรกวิเสสฏฺฐทีปโก หิ เอตฺถ อภิสทฺโท "พาฬฺหา เม ทุกฺขา เวทนา อภิกฺกมนฺติ, โน ปฏิกฺกมนฺติ ๒- อภิกฺกนฺตวณฺเณนา"ติอาทีสุ ๓- วิย. ตสฺมา ยถา สมุสฺสิเตสุ พหูสุ ฉตฺเตสุ จ ธเชสุ จ ยํ อติเรกปฺปมาณํ วิเสสวณฺณสณฺฐานญฺจ ฉตฺตํ, ตํ อติจฺฉตฺตนฺติ วุจฺจติ. โย อติเรกปฺปมาโณ นานาวิราควณฺณวิเสสสมฺปนฺโนว ธโช, โส อติธโชติ วุจฺจติ. ยถา จ เอกโต สนฺนิปติเตสุ พหูสุ ราชกุมาเรสุ เจว เทเวสุ จ โย ชาติโภคยสอิสฺสริยาทิสมฺปตฺตีหิ อติเรกตโร เจว วิเสสวณฺณตโร ๔- จ ราชกุมาโร, โส อติราชกุมาโรติ วุจฺจติ. โย อายุวณฺณอิสฺสริยยสสมฺปตฺติอาทีหิ อติเรกตโร เจว วิเสสวณฺณตโร จ เทโว, โส อติเทโวติ วุจฺจติ. ตถารูโป พฺรหฺมาปิ อติพฺรหฺมาติ วุจฺจติ. เอวเมว อยมฺปิ ธมฺโม ธมฺมาติเรกธมฺมวิเสสฏฺเฐน อภิธมฺโมติ วุจฺจติ.